Trump: Rusia dhe Ukraina të ulen në tryezën e bisedimeve

Presidenti amerikan Donald Trump ka deklaruar se Shtetet e Bashkuara kanë një afat për arritjen e një “marrëveshjeje paqeje” midis Ukrainës dhe Rusisë dhe se të dy vendet duhet “të vijnë në tryezën e bisedimeve”.

“Ne po presim një kohë të gjatë. Ata duhet të ulen në bisedime. Dhe unë mendoj se ne do të arrijmë paqen”, tha Trump, duke shprehur besimin se Kievi dhe Moska duan paqe.

Presidenti amerikan pohoi gjithashtu se 5 mijë të rinj po vdesin çdo javë në luftën në shkallë të gjerë të Rusisë kundër Ukrainës dhe se atij nuk i pëlqen që lufta po zgjatet.

“Unë mendoj se si Rusia dhe Ukraina duan të bëjnë paqe. Megjithatë, besoj se ka shumë urrejtje, po rrjedh shumë gjak, ka shumë mosbesim. Por mendoj dhe shpresoj se do të arrijmë paqen – për hir të shumë të rinjve që po vdesin” shtoi Trump.

Ai më pas tha se ka “afatin” e tij deri në të cilin duhet të arrihet paqja.

“Unë kam afatin tim… Dhe pas kësaj, ne do të kemi një qëndrim shumë të ndryshëm. Por mendoj se ka një shans shumë të mirë për ta arritur atë”, përfundoi Trump.

Më herët Trump deklaroi se nuk ishte “i kënaqur” me sulmet e raketave ruse në Kiev që vranë të paktën 12 njerëz dhe iu drejtua drejtpërdrejt liderit të Kremlinit: “Vladimir, ndalo!”

/rtsh.al/