U mbush kupa, mjaft më me "vuvuzela"!

Trumbetat që gumëzhijnë gjatë gjithë lojës, nuk u pëlqejnë aspak telespektatorëve, mediave, dhe sidomos futbollistëve e trajnerëve. Leo Mesi është një nga ata që është ankuar më tepër: “Nuk kuptohet asgjë, pasi nuk mund t’u flasësh dot shokëve të skuadrës”. Të njëjtin shqetësim shtroi edhe kapiteni i Francës, Patris Evra: “Për faj të borive, nuk arrijmë të kuptohemi në fushë. Madje as nuk mund të flemë natën, pasi ato fillojnë në dëgjohen që në 6 të mëngjesit”.

“Kemi pasur disa ankesa. Disa herë kemi provuar të vendosim rregull. Kemi kërkuar që “vuvuzelat” të mos bien gjatë himneve kombëtare dhe gjatë kohës kur ndërhyn folësi i stadiumit. është e vështirë, por po bëjmë të pamundurën. Nëse vazhdojnë të krijojnë shqetësime, mund t’i heqim fare”, tha presidenti i komitetit organizator të “Afrika e Jugut 2010”, Deni Xhordan. Po si mund të krijohet atmosferë nga tifozët në stadium? “Më mirë le të këndojnë”.