UASHINGTON – SHBA i kërkon Evropës dhe aleatëve të frenojnë migracionin
UASHINGTON, 27 nëntor /ATSH/- Sekretari amerikan i Shtetit, Marco Rubio, u ka kërkuar diplomatëve amerikanë në Evropë, Kanada, Australi dhe Zelandën e Re që të ushtrojnë presion mbi qeveritë për të kufizuar ndjeshëm migracionin, sipas një dokumenti diplomatik të siguruar nga “The New York Times”.
Sipas dokumentit, diplomatët udhëzohen të nxjerrin në pah krimet e dhunshme të lidhura me njerëz me prejardhje migrante dhe të raportojnë çdo politikë të qeverive lokale që favorizon padrejtësisht migrantët në kurriz të popullsisë lokale.
Rubio kërkon që diplomatët amerikanë të ndërtojnë mbështetje midis qeverive pritëse për politika më të ashpra të migracionit, duke argumentuar se imigracioni i përhapur “rrezikon kohezionin social dhe sigurinë publike”.
Dokumenti përfshin 12 pika komunikimi që do të përdoren në bisedimet me qeveritë pritëse, duke përfshirë edhe nxitjen e tyre për të ndërmarrë veprime kundër ndikimeve negative të migrimit masiv, përfshirë zhvendosjen, ngacmimet seksuale dhe prishjen e rendit publik”.
Për vendet evropiane, është shtuar edhe një këshillë për të qenë “vigjilentë ndaj radikalizmit islamik të përhapur mes disa komuniteteve migratore”.
Për vendet evropiane, këshillohet gjithashtu të jenë vigjilentë kundër përhapjes së radikalizmit islamik midis disa komuniteteve migrante.
Ky dokument nuk paraqet asnjë të dhënë statistikore që mbështet këto pretendime, pavarësisht se pretendohet ekzistenca e tyre.
Administrata Trump po e nxit diplomacinë amerikane të luajë një rol aktiv në përhapjen e qasjes së saj të ashpër ndaj migracionit, edhe pse të dhënat zyrtare evropiane tregojnë se kalimet e paligjshme të kufirit në BE kanë qenë në rënie, në muajt e fundit të administratës Biden.
Ndërkohë, Departamenti Amerikan i Shtetit (DASH) u ka kërkuar diplomatëve që edhe në raportet vjetore të të drejtave të njeriut – të përfshijnë rastet kur qeveritë e huaja mbështesin migracion të paligjshëm ose masiv – si dhe rastet kur ato kufizojnë fjalën e lirë të grupeve të ekstremit të djathtë që kritikojnë emigracionin. //a.i/