UKRAINË – Zelensky i hapur për referendum në vijën e frontit

KIEV, 18 shkurt /ATSH/- Në një intervistë për “Axios”, Zelensky paralajmëroi udhëheqësit amerikanë për rrezikun e imponimit të një zgjidhjeje paqeje që Ukraina do ta refuzonte.

Ai përjashtoi çdo lëshim të mëtejshëm territorial, por sugjeroi që ukrainasit mund të pranonin ngrirjen e konfliktit përgjatë vijave aktuale të frontit në një referendum.

Një votim i tillë mund të mbahet së bashku me zgjedhjet presidenciale.

Zelensky hodhi poshtë kërkesat ruse për tërheqjen e trupave ukrainase nga rajonet lindore të Luhanskut dhe Donetskut.

Sipas Zelensky, qeveria e tij ka rënë dakord me SHBA-në se çdo marrëveshje do të kërkojë miratimin e popullit ukrainas në një referendum.

Presidenti ukrainas tha se do të preferonte zgjidhjen e çështjes se territoreve të diskutueshme përmes një samiti të drejtpërdrejtë me Putinin.

“Ai tha se kishte udhëzuar delegacionin e tij të diskutonte këtë çështje në Gjenevë”, raportoi “Axios”.

Ndërsa Kremlini nuk e ka refuzuar plotësisht mundësinë e një samiti, ai ka theksuar nevojën për përgatitjen e duhur dhe nuk ka treguar gatishmëri konkrete për ta çuar atë përpara.

Ukraina i ka rezistuar pushtimit rus me mbështetjen e Perëndimit që nga shkurti i vitit 2022.

Që nga ardhja në detyrë e Trump në janar 2025, Shtëpia e Bardhë është përpjekur të ushtrojë presion mbi të dyja palët drejt një përfundimi të negociuar të luftës. //a.i/