Udhëzimi, 11 rregullat për të udhëtuar pa viza në Greqi

TIRANË - Ambasada greke në Tiranë dhe konsullatat e saj në disa qytete të Shqipërisë, kanë shpërndarë një kujtesë për rregullat e udhëtimit në zonën Shengen. Me anë të një liste, e cila ndahet në 11 pika, pala greke sqaron kërkesat kryesore që duhet të plotësojnë shtetasit shqiptar për zbatimin e rregullave të lëvizjes pa viza. Ky informacion publikohet pas kthimit të një numri të konsiderueshëm shqiptarësh në pikat kufitare me shtetin fqinj.
Më poshtë, publikohen 11 rregullat e bëra publike nga ambasada dhe konsullatat greke në Shqipëri.

1. Hyrja në zonën Shengen pa vizë konsiston në një periudhë kohore të shkurtër. Ajo nuk përbën shqetësim në të gjitha ato raste që nuk përfshijnë një udhëtim me qellim rehabilitimi, tregtie, arsimimi dhe jo për punësim. Ky qëndrim nuk duhet të tejkalojë 90 ditë gjatë një gjashtëmujori.

2. Heqja e vizave Shengen i përket vetëm qytetarëve të pajisur me pasaporta të reja biometrike.

3. Lëvizja e lirë i përket vetëm sistemit të vizave Shengen (C). Ndër të tjera, janë hequr vizat për turizmin, për qëllime biznesi, për shoferet TIR, për qëllime mjekësore, për pjesëmarrje në evente artistike, sportive e në ngjarje të tjera. Gjithashtu, janë hequr vizat për bashkëshortet dhe familjet e shtetasve grekë ose shtetas të një shteti anëtar të BE-së.

4. Nuk janë liberalizuar vizat kombëtare (D), d.m.th., vizat që i përkasin bashkimit familjar, punësimit sezonal, minoritaret (shtetasit shqiptarë me origjinë greke), studimeve etj.

5. Ata, të cilët janë të pajisur me pasaportë biometrike dhe kanë vizë Shengen, ku kohëqëndrimi është më pak se 90 ditë gjatë një gjashtëmujori, por mbaron pas datës 15/12/2010, duhet të mbarojnë ketë afat kohor, përpara se të kthehen në shtetin përkatës. Në qoftë se dikush ka marrë vizë dhe fillon të jetë e vlefshme 1/12/2010 dhe hyn në zonën Shengen në 2/12/2010 numërimi i 90 ditëve fillon po atë datë, 2/12/2010.

6. Hyrja në zonën Shengen komandohet nga dispozitat e ligjit për të drejtën e komunitetit Shengen. Konkretisht, të interesuarit duhet të kenë dokumente udhëtimi të vlefshme, të mos jenë të regjistruar si të padëshirueshme në sistemin e informacionit Shengen, si dhe në bazë të të dhënave kombëtare të shteteve anëtare të BE-së, të mos konsiderohen si një kërcënim për rendin publik, sigurinë, shëndetin publik ose marrëdhëniet ndërkombëtare të shteteve anëtare të BE-së.

7. Gjithashtu, palët e interesuara që duhet të kalojnë jashtë kufijve duhet t'u argumentojnë hyrjen në zonën Shengen autoriteteve kufitare të kontrollit të shteteve anëtare të BE-së. Ata duhet të argumentojnë mjaftueshëm qëllimin dhe kushtet e qëndrimit me dokumentet e domosdoshme. Ky i fundit duhet të provojë që ka mjete jetese të mjaftueshme për nevojat që lindin gjithë qëndrimit.

8. Veçanërisht, autoritetet kufitare të kontrollit të shteteve anëtare të BE-së nga ku do të bëhet hyrja për në zonën e Shengenit, do të duhet të shqyrtojnë nëse personi ka:
a) Sigurim shëndetësor
b) Të ardhurat e nevojshme për periudhën e qëndrimit dhe ndër të tjera mund të jetë mbajtës i një kartë krediti (Ju lutem kini parasysh se minimumi i të ardhurave për një ditë, sipas Legjislacioni Grek, konsiston në shumën prej 50 €),
c) Dokumente që vërtetojnë akomodimin e udhëtimit në ato raste që nuk bëhet fjalë për një vizitë private familjare, por për turizëm rekreativ (p.sh., rezervime hoteli, bileta ajrore me datën e kthimit etj.)

9. Për më tepër, autoritetet e kontrollit të kufirit kanë të drejtë të kërkojnë ndër të tjera:
a) Ftesa për pjesëmarrjen në konferenca dhe ngjarje të natyrës tregtare, ose ftesa nga kompanitë për kontaktet e biznesit, në ato raste që i përkasin udhëtimeve të biznesit,
b) leje qarkullimi ndërkombëtare për shoferët e kamionëve e transportit, si dhe dokumentet e porositura të mallrave nga firmat import-eksporte etj.
c) Një vërtetim mjekësor nga institucionet në të cilat të interesuarit janë pranuar për vizitë dhe trajtim, në ato raste që udhëtimet janë të ndërmarra për arsye mjekësore dhe prova për mjete të mjaftueshme financiare për pagesën e trajtimit mjekësor (p.sh., llogarite bankare)
d) Ftesë për evenimente artistike dhe ngjarje sportive për udhëtarët që udhëtojnë për motive të tilla etj.
10. Në çdo rast, nëse ndonjë nga kriteret e mësipërme nuk plotësohen, ose vënë re ndonjë shkelje, sidomos autoritetet e para kufitare të shtetit, mund të refuzojnë hyrjen në zonën e Shengenit.
11. Zbatimi i këtyre kushteve nga të interesuarit cilësohet si thelbësor për lehtësimin e punës së autoriteteve kufitare.

18 Dhjetor 2010