VV:Prishtina për festë plot simbole kombëtare

PRISHTINË- Tre ditë para festës së Pavarësisë ekzekutivi i Kosovës nuk ka njoftuar se do të kenë ndonjë aktivitet të veçantë me të cilin do ta shënojnë 99-vjetorin e shpalljes së pavarësisë së Shqipërisë.  Më aktivja për 28 Nëntorin, do të jetë Lëvizja Vetëvendosje, e cila ka njoftuar se të hënën e ardhshme do të ketë disa aktivitete në disa qytete të Kosovës.

Në Gjakovë dhe Prizren Vetëvendosja do të organizojë dy tribuna me temën Shekulli i dytë i pavarësisë, nga pavarësi e cunguar në pavarësi të plotë, ndërsa në Prishtinë, do të ketë aktivitete të shumta, ku nuk do të mungojë as zbukurimi i qytetit me amuj kombëtarë.

Përveç tribunës Kontributi i gruas në luftën çlirimtare 1997-1999, që do të mbahet në kryeqytet, në sheshin Nëna Terezë, kjo lëvizje ka paraparë të hapë një panair të prodhimeve vendore, ekspozitë të fotograve, kënd të fëmijëve, ku ata do të pikturojnë dhe do të bëjnë punime të ndryshme, si dhe do të ketë muzikë folklorike dhe muzikë të zhanreve të tjera.

Deputeti i Vetëvendosjes, Glauk Konjufca, ka kritikuar qeverinë se ka tjetërsuar çdo gjë që ka të bëjë me aspektin kombëtar të shqiptarëve, përfshi festat dhe simbolet kombëtare.

Ndërkohë Kuvendi i Kosovës, sipas zyrtarëve të këtij institucioni, nuk do të ketë ndonjë aktivitet, ndërsa kryeparlamentari Jakup Krasniqi ka bërë të ditur se hënën nuk do të rrijë duarkryq.

Festën e lloj me vendosjen e luleve në kompleksin memorial të Jasharajve (në Prekaz) dhe e mbyll me pjesëmarrjen në pritjen që e organizon Ambasada e Shqipërisë, ka thënë shkurt Krasniqi.

As presidentja e vendit, Atifete Jahjaga nuk ka paraparë ndonjë organizim të veçantë për nder të kësaj dite. Zyrtarët e Presidencës të premten kanë refuzuar të japin detaje rreth aktiviteteve të presidentes më 28 Nëntor, si dhe pjesëmarrjes ose jo të saj në ndonjë ngjarje festive.

Do të njoftoheni me agjendën me kohë, është përgjigja e vetme që gazeta Zëri ka marrë nga Arbër Vllahiu, këshilltar për medie i presidentes Jahjaga.