Vdekja e Fialkovës, Berisha ngushëllon homologun çek

Kryeministri Berisha i shprehu sot ngushëllimet, kryeministrit të Çekisë, zotit Petr Neas, për ndarjen nga jeta të znj. Marketa Fialkova, ambasadore e Jashtëzakonshme dhe Fuqiplotë e Republikës Çeke në Shqipëri.

Sipas policisë, Fialkova është gjetur e pa jetë në rezidencën e saj pas mesnate dhe shkaqet e vdekjes së saj janë vlerësuar si natyrale.

Më poshtë telegrami i plotë ngushëllues i kryeministrit Berisha dërguar homologut të tij çek, Petr Neas

Shkëlqesi,

Me hidhërim të thellë mora vesh lajmin për ndarjen e papritur nga jeta të Znj. Marketa Fialkova, Ambasadore e Jashtëzakonshme dhe Fuqiplotë e Republikës Çeke në Republikën e Shqipërisë.

Në këtë moment të trishtuar, më lejoni tJu shpreh Juve dhe nëpërmjet Jush, familjarëve dhe të afërmve të Ambasadores Fialkova, ngushëllimet më të sinqerta për këtë humbje të madhe.

Ambasadorja Fialkova, që nga viti 2007 kur erdhi në Shqipëri  e deri në momentin e ndarjes së saj të dhimbshme nga jeta, punoi me përkushtim duke dhënë një kontribut të çmuar për forcimin e mëtejshëm të marrëdhënieve mes dy vendeve dhe dy popujve tanë. Dëshiroj të vlerësoj, veçanërisht, bashkëpunimin e ngushtë me të, në kuadër të Presidencës çeke të BE-së.

Duke ndarë me ju, vlerësimin e lartë për personalitetin e kësaj diplomateje të shquar dhe një mikeje të mirë dhe të paharruar të shqiptarëve, shpreh bindjen time të thellë për vazhdimësinë e përmbushjes së angazhimeve të marra së bashku me Ambasadoren Fialkova, si shenjë respekti dhe mirënjohje për kontributin e saj të çmuar.

Sinqerisht,

Sali Berisha.