Vendimi i “Kushtetueses” për Veliajn, Berisha: U zbatua ligji

TIRANË, 3 nëntor /ATSH/ Kreu i Partisë Demokratike, Sali Berisha, duke folur për mediet pas përfundimit të mbledhjes së kryesisë së PD-së, reagoi për vendimin e Gjykatës Kushtetuese që ka lënë Erion Veliajn në detyrë.

Berisha u shpreh se, gjyqtarët zbatuan ligjin.

“E komentoj si një vendim të gjyqtarëve që në këtë rast zbatuan ligjin”, u shpreh Berisha.

Por gjithashtu, shtoi ai, “e shoh si një dhuratë që Edi Rama, që nuk njeh asnjë ligj e moral, ia bëri pa dashje kundërshtarit të tij”.

“Ai e trajtoi në burg në mënyrë që shkeli Konventën Europiane të të Drejtave të Njeriut, Kushtetutën dhe çdo standard të një shteti ndaj të burgosurve. Me këtë veprim, ai i dha Erion Velisë avantazhin e sotëm de facto”, theksoi ai.

Gjykata Kushtetuese doli sot me një vendim për çështjen e Erion Veliajt, duke i dhënë të drejtë të vijojë detyrën si kryetar i bashkisë së Tiranës.

Togat e zeza në gjykatën kushtetuese kanë vendosur 5 me 3 në favor të tij.

Në këtë mënyrë rrëzohet vendimi i qeverisë që e shkarkonte nga posti pas propozimit që i kishte bërë këshilli bashkiak i Tiranës.

Dhënia e këtij vendimi do të thotë po ashtu se në kryeqytet nuk do të zhvillohen zgjedhje, duke e bërë edhe dekretin e Presidentit të Republikës, Bajram Begaj të pavlefshëm.

/gj.m/r.e/a.f/