Zbulohen 100 vizatime të Caravaggios

Ekspertët italianë kanë zbuluar rreth 100 vizatime dhe disa piktura mjeshtrit të madh të Renesancës, Caravaggio, në kohën kur ai po studionte artin në Milano, raporton agjencia e lajmeve ANSA.

Vizatimet dhe pikturat - të cilat sipas parallogaritjeve të para nga ekspertët vlerësohet të kushtojnë deri në 700 milionë euro - janë zbuluar në koleksionin e punimeve të tij që ruhen në Kështjellën Sforza të Milanos dhe është konstatuar se janë vepra të nxënësit të piktorit Simone Peterzano, tek i cili Caravaggio mësonte mjeshtërinë e artit figurativ prej moshës 11-vjeçare.

Veprat e hershme të Caravaggios janë publikuar të premten në një version të librit elektronik. “Pos veprave do të publikohet edhe një letër proteste, të cilën e ka shkruar dhe nënshkruar Caravaggio i ri”, raporton ANSA.

Michelangelo Merisi (1571-1610) apo Caravaggio ka mbetur i njohur edhe për temperamentin e papërmbajtshëm. Biografia e tij është e mbushur me momente telashesh, vrasjesh dhe rrëmbimesh. Njihet si i pari piktor i madh barokien. Veprat e tij njihen për një paraqitje realiste si dhe përdorimin e teknikës "chiaro-scuro" - një kontrast i theksuar i dritës dhe i hijes. Vdiq nga ethet dhe u varros në një varrezë masive.