Zgjerimi i superstradës Tiranë–Durrës, ARRSH ndan pamjet: Avancojnë punimet në Laknas dhe Kashar
Punimet për zgjerimin e superstradës Tiranë–Durrës, në kuadër të Fazës III të projektit, po vijojnë në disa fronte pune, ndërsa sipas Autoritetit Rrugor Shqiptar, ecuria e punimeve ka tejkaluar grafikun e parashikuar.
Në kantier po punohet paralelisht për ndërtimin e nyjes së re të Laknasit dhe mbikalimit të ri të Kasharit, dy prej ndërhyrjeve të rëndësishme të kësaj faze. Krahas tyre, vijon edhe puna për formimin e trupit të rrugës dhe realizimin e ndërhyrjeve të tjera infrastrukturore të parashikuara në projekt.
Zgjerimi i aksit Tiranë–Durrës synon të përmirësojë ndjeshëm kushtet e qarkullimit në një prej segmenteve rrugore më të ngarkuara në vend. Projekti parashikon rritjen e kapacitetit të superstradës, përmirësimin e sigurisë rrugore dhe lehtësimin e trafikut, veçanërisht në zonat ku fluksi i automjeteve është më i lartë.
Sipas ARRSH-së, ritmi i punimeve në këtë fazë tregon një ecuri pozitive të projektit, ndërsa ndërhyrjet në nyjet dhe strukturat e reja pritet të ndikojnë në organizimin dhe përmirësimin e lëvizjes përgjatë aksit Tiranë–Durrës.
Superstrada Tiranë–Durrës është një nga arteriet kryesore të transportit në vend, duke lidhur kryeqytetin me Durrësin dhe zonat përreth. Për këtë arsye, zgjerimi dhe përmirësimi i saj konsiderohet një ndër projektet me rëndësi për infrastrukturën rrugore dhe menaxhimin e trafikut në këtë korridor.
Njoftimi i Autoritetit Rrugor Shqiptar:
Tiranë–Durrës Faza III
Punimet për zgjerimin e Superstradës Tiranë–Durrës, Faza III, vijojnë me ritme të larta, duke shënuar progres të ndjeshëm dhe duke tejkaluar grafikun e parashikuar të punimeve.
Në kantier punohet intensivisht në disa fronte njëkohësisht:
Vijon ndërtimi i nyjes së re të Laknasit dhe i mbikalimit të ri të Kasharit
Punohet për formimin e trupit të rrugës dhe realizimin e ndërhyrjeve të tjera të parashikuara në këtë fazë.
Zgjerimi i superstradës Tiranë-Durrës është një nga projektet më të rëndësishme për infrastrukturën rrugore kombëtare, që synon:
Rritjen e kapacitetit të aksit Tiranë–Durrës
Përmirësimin e sigurisë rrugore
Lehtësimin e qarkullimit dhe reduktimin e problematikave në një prej akseve më të ngarkuara të vendit.
/rtsh.al/