Zjarret në Maui, humbin jetën mbi 30 persona. Biden thirrje qytetarëve për evakuim
Më shumë se 30 persona kanë humbur jetën dhe mijëra të tjerë janë zhvendosur nga zjarret që kanë përfshirë Havain. Kryebashkiaku i Maui, Richard Bissen Jr, bëri me dije se gjashtë persona të tjerë kishin mbetur të lënduar. Bissen u shpreh se numri i viktimave ka gjasa të rritet, ndërsa shtoi se ekipet e kërkim-shpëtimit po vijojnë punën.
“Të paktën gjashtë persona të tjerë u plagosën. Tre prej tyre ishin të lidhura me djegiet, tha ai. Një zjarrfikës u dërgua gjithashtu në spital dhe u trajtua për thithjen e tymit. Shumë struktura janë shkatërruar, disa prej tyre janë djegur “deri në tokë“, tha Bissen.
Teksa zjarret shpërthyen në Maui të martën, roja bregdetare e SHBA u pozicionua në Lahaina për të shpëtuar qytetarët të cilët u hodhën në oqean për t’iu shpëtuar flakëve. Roja Bregdetare tha se 12 prej tyre u shpëtuan.
“Në emër të Rojës Bregdetare të SHBA-së, dëshiroj të përcjell ngushëllimet e mia të sinqerta për komunitetet që janë prekur tragjikisht nga zjarret në Maui. Bashkëpunimi ynë me agjencitë partnere dhe juridiksionet fqinje mbetet e palëkundur, pasi ne bashkojmë burimet, njohuritë dhe pajisjet tona për të siguruar përgjigjen dhe sigurinë publike dhe për të përforcuar ndikimin e përpjekjeve tona të reagimit”, tha kapiteni Aja L. Kirksey, Komandant Sektori i Sektorit të Rojës Bregdetare në Honolulu.
Presidenti Joe Biden shprehu ngushëllimet e tij për familjet e viktimave që humbën jetën nga zjarret.
“Jill dhe unë dërgojmë ngushëllimet tona më të thella për familjet e atyre që humbën të dashurit në zjarret në Maui dhe lutjet tona janë me ata që kanë parë shtëpitë, bizneset dhe komunitetet e tyre të shkatërruara. Ne u jemi mirënjohës zjarrfikësve të guximshëm dhe reaguesve të parë që vazhdojnë të vrapojnë drejt rrezikut, duke e vënë veten në rrezik për të shpëtuar jetë”, tha Biden.
Presidenti amerikan tha se ai ka urdhëruar asetet federale për të ndihmuar në reagimin ndaj zjarrit.
Biden u bëri thirrje banorëve që “të ndjekin urdhrat e evakuimit, të dëgjojnë udhëzimet e reaguesve të parë dhe zyrtarëve dhe të qëndrojnë vigjilentë”.
/rtsh.al/