Zjarri në Myselim-Bardhaj/ Banorët kërkojnë autorët para drejtësisë

Banorët e Myselimit dhe Bardhajve në Shkodër kanë kaluar një natë të vështirë për shkak të zjarrit që iu afrua banesave. Ndërhyrja nga toka dhe ajri bëri të mundur izolimin e vatrave më të rrezikshme dhe shmangien e dëmeve më të mëdha, ndërsa banorët kërkojnë që personat përgjegjës për zjarrin të dalin para drejtësisë.

Sipas banorëve, flakët krijuan rrezik për të gjithë zonën. Disa prej tyre treguan se gjatë natës zjarrfikësit qëndruan pranë banesave në gatishmëri, ndërsa ndërhyrja vijoi pa ndërprerje për të mbrojtur shtëpitë.

“Natë e vështirë” e cilësuan banorët situatën, duke treguar se zjarri ishte pranë banesave dhe se rreziku ishte përhapur në të gjithë zonën.

Ndërhyrja u realizua nga toka dhe ajri. Në Bardhaj-Myselim janë angazhuar 71 efektivë dhe dy helikopterë të Forcave të Armatosura, ndërsa vatra vijon të jetë aktive.

Banorët kërkojnë tashmë që të hetohet shkaku i zjarrit dhe që, nëse konstatohen përgjegjësi, autorët të përballen me ligjin.

Ndërkohë, situata në zonën e Shkodrës mbetet nën monitorim. Përveç Bardhaj-Myselimit, vatra aktive janë raportuar edhe në Mnelë të Vogël, Naraç dhe malin e Tërbunit.