Zviceranët u frikësohen ‘Shqiponjave’

Adrian Nikçi ua ka futur frikën në palcë zviceranëve. Futbollisti kosovar e festoi golin ndaj Hannoverit duke e formuar me duar shqiponjën dykrerëshe, njëjtë siç kishte bërë më parë Pajtim Kasami. Për këtë, Helvetikët frikësohen se futbollistët shqiptarë mund të kenë ndjenja të përziera në përballjen Zvicër-Shqipëri. Ata po ashtu frikësohen se mund të mbeten pa Shaqirin me shokë, kur t’i lejohet përfaqësueses së Kosovës pjesëmarrja në garat ndërkombëtare.

Zviceranët kanë filluar t’u frikësohen ‘Shqiponjave’. Kjo pasi një pjesë futbollistëve shqiptarë që e përfaqësojnë këtë vend, porsa shënojnë gola, me duart e tyre e formojnë shqiponjën dykrerëshe, e cila është simbol i shqiptarëve. Rasti i fundit është ai i Adrian Nikçit. Futbollisti pejan shënoi gol në debutim për Hannoverin, ndërsa e festoi atë duke e formuar me duar ‘shqiponjën krenare’.

Njëjtë kishte vepruar kohë më parë edhe Pajtim Kasami. Futbollisti shqiptar nga Maqedonia, i cili e përfaqëson ekipin U-21 të Zvicrës, kishte shënuar në fanellën e Palermos dhe e kishte formuar shqiponjën me dorë. “Është një përshëndetje shtëpie”, kishte shpjeguar futbollisti aktual i Fulhamit.

A duhet të brengosen tifozët e Zvicrës, kur dihet fakti se ky ekip do të luajë me Shqipërinë në eliminatoret për Botërorin 2014 më 11 shtator, e ku futbollistët do të kenë ndjenja të përziera? Kjo është pyetja të cilën e parashtron magazina zvicerane Blick.

Nëse Kasami e Nikçi luajnë në ekipin e të rinjve, Zvicra ka në ekipin A lojtarë edhe më të rëndësishëm, që janë shqiptarë. Aty luajnë Valon Behrami, Blerim Xhemajli, Xherdan Shaqiri, Granit Xhaka e Admir Mehmedi.

Mesfushori i Bayern Munichut kohë më parë kishte thënë se zemra e tij i takon 50 për qind Kosovës. Ndërsa mesfushori Borussia Monchengladbachut së fundmi kishte thënë se ndihet 80 për qind zviceran e 20 për qind shqiptar, pasi ishte kontestuar për faktin se e këndoi himnin shqiptar në ditët e para të aventurës në M’Gladbach.

Zviceranët janë të brengosur edhe për faktin se Kosova mund ta formojë ekipin e saj me lojtarë që përfaqësojnë vende tjera. “Në vjeshtë do të merret vendimi. Shaqiri me shokë mund të largohen. Në një vend të sapoformuar, ndërrimet e lojtarëve janë të lejuara”, përfundon shkrimi i Blick.

MT: Nikçi, i lumtur që shënoi në debutim

Adrian Nikçi e ka nisur mbarë aventurën në Bundesligë. Ai është treguar një super-xhoker në ndeshjen e parë zyrtare me skuadrën e re Hannover, e cila barazoi në shtëpi përballë Schalkes 2:2.

Sulmuesi kosovar u inkuadrua në lojë në fund të ndeshjes, derisa e ka ndihmuar ekipin e tij të ri që ta shkëputë një pikë në duel me Schalken. Ish futbollisti i Zurichut u fut në lojë në minutën e 77-të dhe pas vetëm tre minutash e shënoi golin e dytë të vendësve në barazimin 2:2.

Mediat gjermane, respektivisht tabloidit i njohur Bild, e kanë lavdëruar mesfushorin kosovar, të cilin e konsideroi një ‘super-xhoker’, dhe i cili i ka arsyetuar menjëherë 600 mijë eurot që i shpenzoi klubi nga Bundesliga për të.

22 vjeçari ndihet i lumtur që e nisi në mënyrë të tillë eksperiencën në Gjermani. “Ishte një fillim i shkëlqyeshëm dhe jam i lumtur që munda ta ndihmoj skuadrën time”, ishin fjalët e para të protagonisti të Bundesligës pas ndeshjes. Përpos Nikçit, për Hannoverin shënoi edhe Felipe (43’), kurse për Schalken realizuan Huntelaar (1:1) e Holtby (64’).