Zyrtarë të Shkupit e Athinë, takime për "emrin"

Përfaqësues zyrtar të Shkupit dhe Athinës kanë zhvilluar gjaë verës takime në nivele të ulëta diplomatike për zgjidhjen e kontestit të emrit të Maqedonisë. Shtypi grek ka shkruar se nuk kanë pushuar përpjekjet intensive për gjetjen e zgjidhjes për kontestin e emrit. "Bashkëpunëtorë të kryeministrit grek Jorgos Papandreu janë protagonistë të negociatave sekrete që ende po zhvillohen midis Shkupit dhe Athinës", shkruan gazeta greke "Macedonia". Sipas kësaj gazete të Selanikut, negociatat janë zhvilluar në prapavijë, me qëllim të afrimit të pozicioneve të të dyja palëve, para se të arrihet zgjidhja përfundimtare dhe të shqyrtohet propozimi më i ri që pritet të pasojë muajin e ardhshëm nga ndërmjetësi i OKB-së, Metju Nimiç. Emri 'Republika e Maqedonisë së Vardarit' në mediat greke është një nga propozimet që mund të shpaloset së shpejti zyrtarisht nga ndërmjetësi i OKB-së, Nimiç.