Zyrtari i Hamasit: Mund të arrihet një marrëveshje për armëpushim në Gaza

Një zyrtar i lartë i Hamasit ka thënë se organizata është e hapur për një marrëveshje me Izraelin, pasi bisedimet që synojnë përfundimin e luftës dhe lirimin e pengjeve rifillojnë në Doha.

Husham Badran, një anëtar i lartë i Byrosë Politike të Hamasit me bazë në Katar, tha në një deklaratë të transmetuar nga agjencia e lajmeve Shehab se një marrëveshje ishte e mundur.

“Kërkesat tona janë të qarta dhe të njohura dhe një marrëveshje mund të arrihet, me kusht që Netanyahu të mbetet i përkushtuar ndaj asaj që tashmë është rënë dakord”, thotë Badran.

Është e paqartë nëse komentet e Badranit janë përgjigje ndaj propozimit të Egjiptit për një armëpushim dy-ditor në Gaza dhe shkëmbimin e katër pengjeve izraelite për disa të burgosur palestinezë, të ndjekur nga 10 ditë bisedime.

Stacioni saudit i lajmeve Al Arabiya raportoi më herët se Hamasi ishte i gatshëm të pranonte propozimin egjiptian për sa kohë që ai përfshihej në kërkesat e tij të 2 korrikut për një marrëveshje pengjesh.

Ai gjithashtu kërkon garanci që Izraeli do të angazhohet për ta bërë propozimin egjiptian pjesë të një marrëveshjeje gjithëpërfshirëse.

Burime të Hamasit i thanë gjithashtu kanalit saudit Asharq News se organizata preferonte një marrëveshje gjithëpërfshirëse sesa një pjesë-pjesë. /vizionplus.tv