Çfarë befasie!
Ndodhi ashtu sikurse ishte pritur. Afërdita Dreshaj u zgjodh Miss Kosova Universe 2011. Fitorja e saj nuk ishte ndonjë befasi e madhe, pasi që një fitore e këtillë ishte paraparë të ndodhë qysh kur ishte marrë vesh se bukuroshja do të konkurrojë për kurorën e më të bukurës së Kosovës.
Dreshaj në finale kishte vetëm një konkurrente, e cila nuk iu shkoq asaj deri në momentin e zgjedhjes së saj.
Ishte kjo Gentiana Cana, e cila ishte zgjedhur përcjellësja e parë e Miss-it. Gentiana kishte shumë më shumë emocione në zgjedhjen e miss-it, ndërkaq emocione nuk kishte aspak Dreshaj, që thuhej se e dinte tashmë se do të zgjidhej më e bukura e Kosovës.
Normalisht, pas përfundimit të Miss shumë vajza kanë thënë për Express së kjo fitore ka qenë e planifikuar dhe nëse ato e kishin ditur se do të shkonte kështu, atëherë nuk do të kishin marrë pjesë në evenimentin që është organizuar nga “Art Motion” dhe fotografi i njohur shqiptar Fadil Berisha.
Pas përfundimit të miss-it, normalisht vajzat kanë pasur vend për zhgënjim sepse fitorja e Dreshajt ishte paraparë dhe se ajo kishte marrë vesh më parë.
Pavarësisht kësaj, miss-i i zgjedhur do ta përfaqësojë Kosovën në Miss Universe 2011 që do të mbahet në Brazil, ndërkaq pas dy edicioneve pa dallavere që kishte rezultuar me zgjedhjen e Marigona Dragushës (përcjellëse e dytë e Miss Universe) dhe Kështjella Pepshit, spektakli i organizuar në Kosovë i ngjasoi spektaklit të parë, të atij kur Zana Krasniqi ishte zgjedhur miss ende pa filluar spektakli.