35 vjetori i përçarë i PD, Grimci: Takimet e Salianjit janë private

Partia Demokratike festoi ditën e sotme 35-vjetorin e themelimit, por ajo që u vu re është përçarja mes të djathtëve, ku lidershipi i PD festoi në selinë blu, ndërsa Ervin Salianji vijoi takimet e tij në Gjirokastër.

Të ftuar në studion e Quo Vadis në Vizion Plus, moderatorja Pranvera Borakaj pyeti kryetaren e PD Dega 9 se si e sheh sjelljen e Salianjit.

Eda Grimci theksoi se këto janë takime private të Salianjit, pasi nëse sheh sallën, më shumë se gjysma e atyre nuk janë anëtarë të PD.

Pjesë nga biseda:

Borakaj: Në momentin që ju festonit 35-vjetorin, Ervin Salianji ishte me mbështetës të tij. Si e shikoni këtë lëvizje?

Grimci: Më vjen keq për mënyrën se si ma drejtove pyetjen, “Salianji me mbështetës të tij”.

Borakaj: Me mbështetës të PD.

Grimci: Ka kërkuar Salianji mbështetje nga demokratët?

Borakaj: Ka një platformë që do të hapë PD-në.

Grimci: PD-në nuk e hap Eda Grimci, e hap anëtarësia me votë. Sot PD kishte 35-vjetorin. Sot është mandati i katërt që qeverisin socialistët. Ne kremtuam themelimin e PD-së, aty dëgjuam si sukseset e PD-së, ashtu edhe nevojshmërinë e madhe që ka PD për një riorganizim brenda shtëpisë e më pas ta çojmë te shqiptarët. PD është e vetmja shpresë për shqiptarët. Fakti që është goditur kaq shumë nga ata që s’e duan, i pari që donte të fliste këtu është kundërshtari im; e dëgjon Berishën më shumë sesa unë.

Kopliku: Kryetari i tyre e ka që në ’91-n mision për vjedhjen e PD-së.

Muharremi: Në 35-vjetor të bënit bilancin pse s’keni bërë kopshte, çerdhe, pse keni bërë vrasje.

Grimci: Zoti Salianji ishte në Gjirokastër.

Borakaj: Ju shqetëson?

Grimci: Ai po bën takime personale, po të shihni në atë sallë, më shumë se gjysma aty nuk janë anëtarë të PD.

Borakaj: Po çfarë janë?

Grimci: Qytetarë.

Borakaj: Mund të tërheqë Salianji të pakënaqurit?

Grimci: Nëse kjo është platformë e Salianjit, le të vijë ta prezantojë.