97% e turistëve gjatë dhjetorit erdhën nga Europa
TIRANË, 23 janar /ATSH/ Turistët nga Europa kryesuan hyrjet e shtetasve të huaj në Shqipëri, gjatë muajit dhjetor 2025, sipas të dhënave të publikuara nga INSTAT.
Referuar statistikave, në muajin dhjetor 97 % e hyrjeve të shtetasve të huaj në Shqipëri kanë qenë nga kontinenti evropian.
Nga këta, 85 % e vizitorëve nga ky kontinent vijnë nga Evropa Jugore, ndjekur nga Evropa Perëndimore me 6 % dhe Evropa Veriore me 4 %, duke treguar një dominim të qartë të rajonit jugor të Evropës në flukset turistike drejt Shqipërisë.
Sipas INSTAT, 97 % e vizitorëve të huaj kanë hyrë për qëllime personale, duke shënuar një rritje prej 6,6 % krahasuar me dhjetorin 2024, ndërsa hyrjet për qëllime biznesi dhe profesionale janë rritur me 13 %, duke reflektuar interesin në rritje për aktivitete ekonomike dhe bashkëpunim profesional në vend.
Të dhënat e INSTAT theksojnë se flukset turistike ndërkombëtare vazhdojnë të jenë në rritje, ndërsa Shqipëria forcon pozicionin e saj si destinacion i preferuar për udhëtime personale dhe biznesi. Ky trend është i lidhur edhe me promovimin e destinacioneve turistike, përmirësimin e shërbimeve dhe mundësitë e reja për zhvillimin e turizmit gjithëvjetor.
e.xh/j.p/