Angli, oficeri i policisë filmohet duke dhunuar brutalisht një burrë në aeroport

Një oficer policie në Angli është filmuar duke goditur dhe shkelmuar në kokë një burrë të shtrirë në tokë në aeroportin e Mançesterit.

Në një video të shpërndarë në internet, oficeri shihet duke mbajtur një armë elektroshok mbi burrin, i cili është i shtrirë me fytyrën poshtë, përpara se ta godasë dy herë, ndërsa oficerët e tjerë u bërtasin personave të tjerë që ishin të pranishëm.

Policia e Mançesterit tha se oficerët ishin sulmuar ndërsa po përpiqeshin të arrestonin dikë pas një përleshjeje në Terminalin 2 të aeroportit.

Policia tha se “pranon shqetësimet e sjelljes brenda videos” dhe konfirmoi se një oficer ishte hequr nga detyrat operative.

“Ne e dimë se video e një incidenti në Aeroportin e Mançesterit që po qarkullon gjerësisht tregon një ngjarje që është vërtet tronditëse dhe për të cilën njerëzit me të drejtë janë jashtëzakonisht të shqetësuar. Përdorimi i një force të tillë në një arrestim është një dukuri e pazakontë dhe ne e kuptojmë se krijon alarm. Një oficer është larguar nga detyrat”, thuhet në deklaratë.

Oficerët ishin thirrur në aeroport rreth orës 20:25 të mëngjesit të së martës pas raportimeve për një grindje, tha një zëdhënës i policisë.

“Tre oficerë u grushtuan në tokë në një sulm të dhunshëm kur u përpoqën të arrestonin një nga të dyshuarit. Meqenëse oficerët e pranishëm ishin oficerë të armëve të zjarrit, ekzistonte një rrezik i qartë gjatë këtij sulmi që t’u merreshin armët e tyre të zjarrit”, shtoi ai.

Dy burra u arrestuan nën dyshimin për sulm, sulm ndaj punonjësit të urgjencës, përleshje dhe pengim të policisë, ndërsa dy burra të tjerë u arrestuan gjithashtu nën dyshimin për sulm. Tre oficerë u dërguan në spital për trajtim./ SkyNews

/rtsh.al/