Arabia Saudite ekzekuton pesë shtetas të huaj për trafik droge, 205 ekzekutime që prej fillimit të vitit
Pesë shtetas etiopianë u ekzekutuan të premten në Arabinë Saudite, pasi u shpallën fajtorë për trafik droge. Lajmi u bë i ditur nga Ministria e Brendshme saudite, ndërsa numri i ekzekutimeve në mbretëri që prej fillimit të vitit ka arritur në 205, sipas një përllogaritjeje të agjencisë AFP, bazuar në njoftimet zyrtare.
Sipas deklaratës së ministrisë, të transmetuar nga Agjencia Saudite e Shtypit, pesë personat u dënuan për kontrabandë hashashi në territorin e mbretërisë.
Ky është ekzekutimi i tretë i një grupi shtetasish etiopianë brenda tre muajve. Pesë etiopianë u ekzekutuan në qershor dhe pesë të tjerë në korrik. Sipas të dhënave të raportuara, numri i shtetasve etiopianë të ekzekutuar këtë vit ka arritur në 32, duke i bërë ata grupin më të madh mes të huajve ndaj të cilëve është zbatuar dënimi me vdekje në Arabinë Saudite.
Vitin e kaluar, Arabia Saudite ekzekutoi 356 persona, shifra më e lartë e regjistruar ndonjëherë në mbretëri. Sipas Amnesty International, vendi renditet i treti në botë për numrin e ekzekutimeve gjatë periudhës 2022–2025, pas Kinës dhe Iranit.
Arabia Saudite është kritikuar vazhdimisht nga organizatat e të drejtave të njeriut për përdorimin e dënimit me vdekje. Këto organizata vlerësojnë se autoritetet saudite e zbatojnë këtë dënim në mënyrë të shpeshtë, në kundërshtim me përpjekjet për ta paraqitur vendin si një shtet modern.
Nga ana tjetër, Riadi mbron përdorimin e dënimit me vdekje, duke argumentuar se ai është i nevojshëm për ruajtjen e rendit publik dhe zbatohet vetëm pasi janë shteruar të gjitha mjetet ligjore.
Lajme të Sugjeruara
