BERLIN – Merz përballet me thirrje të forta për të vepruar ndaj krizës humanitare në Gaza

BERLIN, 31 korrik /ATSH-DPA/ – Kancelari gjerman Friedrich Merz po përballet me presion në rritje nga partnerët qeveritarë, organizatat humanitare dhe figurat e shquara publike për të adresuar krizën humanitare që po përkeqësohet në Rripin e Gazës.

Një grup prej 13 organizatash humanitare, përfshirë Oxfam dhe Mjekët pa Kufij, i bënë thirrje kancelarit të thërrasë një “Samitin e Krizës Humanitare” në Berlin, duke u përqendruar në mënyrat për të mbështetur popullsinë civile në vështirësi në Rripin e Gazës.

Organizatat theksuan se shpërndarja e ndihmave në shkallë të gjerë ka qenë prej kohësh plotësisht e realizueshme.

“Infrastruktura është gati, ndihma është e disponueshme dhe ne, si organizata, jemi gati”, thuhej në letrën e përbashkët drejtuar Merz.

“Ajo që mungon është vullneti politik për t’i dhënë fund bllokadës së vendosur nga qeveria izraelite dhe për të lejuar më në fund aksesin e papenguar humanitar”, deklaruan organizatat humanitare.

Organizatat kritikuan dërgesat e fundit nga ajri të ndihmave në Gaza, në të cilat pritet të marrë pjesë Gjermania, duke i quajtur ato të rrezikshme dhe joefikase. /os/