BRUKSEL – Von der Leyen & Costa: Nuk ka vend për mohimin e gjenocidit të Srebrenicës

BRUKSEL, 11 korrik /ATSH-DPA/ – Zyrtarët më të lartë të Bashkimit Evropian përkujtuan masakrën e Srebrenicës, në të cilën u vranë rreth 8 000 myslimanë boshnjakë në vitin 1995 gjatë luftës në Bosnjë, dhe paralajmëruan për mohimin e gjenocidit.

“Disa ngjarje në histori hedhin një hije që shtrihet nëpër breza. Gjenocidi në Srebrenicë është një prej tyre. Ai qëndron ndër kapitujt më të errët në kujtesën kolektive të Evropës”, theksoi presidentja e Komisionit Evropian Ursula von der Leyen.

Më 11 korrik 1995, serbët e Bosnjës pushtuan enklavën myslimane të Srebrenicës. Në ditët pasuese, u vranë rreth 8 000 njerëz, shumica e të cilëve ishin burra dhe djem adoleshentë.

Gjykatat ndërkombëtare e njohën zyrtarisht masakrën si gjenocid.

“Është detyra jonë të kujtojmë dhe të ruajmë të vërtetën, në mënyrë që brezat e ardhshëm të dinë saktësisht se çfarë ndodhi”, shtoi von der Leyen.

“Ne hedhim poshtë dhe dënojmë me forcë çdo mohim, shtrembërim ose minimizim të gjenocidit të Srebrenicës, si dhe glorifikimin e kriminelëve të luftës”, shtoi ajo.

Sipas raportimeve të mediave lokale, incidentet e mohimit të gjenocidit të Srebrenicës janë në rritje, me udhëheqjen rajonale të serbëve të Bosnjës në Bosnje-Hercegovinë që merr pjesë në mohime./   /os/