Berisha: Edi Rama po mbyll përfundimisht dyert e BE-së, por kjo nuk do bëhet realitet

Kreu i Partia Demokratike e Shqipërisë, Sali Berisha, akuzoi kryeministrin Edi Rama se po dëmton procesin e integrimit europian të vendit dhe se, sipas tij, po “mbyll përfundimisht dyert e BE-së për shqiptarët”.

Deklaratat u bënë gjatë një komunikimi me mediat, ku Berisha u pyet nga gazetarja Anisa Kadesha e RTSH mbi strategjinë e opozitës në protestën e paralajmëruar para Parlamentit, në një kohë kur disa deputetë janë shprehur publikisht pro ngujimit në sallë.

Berisha tha se deputetët e opozitës kanë shprehur vendosmërinë për të ndërmarrë edhe forma ekstreme proteste, përfshirë grevën e urisë.

“Deputetët prej kohësh kanë shprehur vendosmërinë që të kalojnë edhe në akte sublime, grevë urie dhe asgjë nuk përjashtohet. Por çdo hap duhet të ndërmerret në momentin e duhur. Mendoj se fjala e sovranit është çështja më kryesore në rendin e ditës”, u shpreh ai.

Sipas tij, situata politike në vend është e paprecedentë dhe kërkon reagim qytetar.

Berisha kritikoi ashpër qëndrimet e fundit të kryeministrit lidhur me integrimin, duke pretenduar se qeveria po tërhiqet nga objektivi i anëtarësimit të plotë në Bashkimi Evropian.

Ai iu referua edhe një artikulli të publikuar në Frankfurter Allgemeine Zeitung, ku, sipas tij, Rama dhe presidenti serb Aleksandar Vučić sugjerojnë një model bashkëpunimi me BE-në të kufizuar në tregti të lirë dhe fonde, pa përmbushjen e plotë të kritereve të anëtarësimit.

Berisha akuzoi qeverinë se nuk synon të përmbushë kriteret e Kopenhagenit, që lidhen me zgjedhje të lira, drejtësi të pavarur dhe standarde demokratike.

Në përfundim, lideri i opozitës u shpreh se, pavarësisht zhvillimeve politike, integrimi i Shqipërisë në BE nuk mund të ndalet.

“Shqiptarët asgjë nuk do mund t’i pengojë në rrugëtimin e tyre drejt integrimit të plotë në BE”, deklaroi Berisha, duke theksuar se beteja politike do të vazhdojë në funksion të këtij objektivi.