Bllokohet totalisht aksi Qukës-Qafë Plloçë, rrëshqitje masive dherash, një mjet goditet nga inertet, bllokohen të dyja korsitë

Aksi kombëtar Qukës-Qafë Plloçë është bllokuar plotësisht mbrëmjen e sotme, duke e bërë të pamundur qarkullimin e automjeteve. Situata është rënduar pasdite, kur një rrëshqitje e re dhe masive e dherave bllokoi të dyja kahet e lëvizjes, duke izoluar këtë arterie të rëndësishme.

Problemet në këtë aks kanë nisur që në orët e para të ditës së sotme. Fillimisht, situata u bë e rrezikshme në daljen e tunelit, ku një automjet u dëmtua pasi u godit nga inertet që rrëshqitën nga shpati i malit.

Më pas, rrëshqitjet vijuan në një segment tjetër, duke bllokuar fillimisht njërën korsi, ndërsa qarkullimi vijoi me vështirësi në korsinë tjetër.

Pak minuta më parë, situata doli jashtë kontrollit pas një rrëshqitjeje të re masive që mbuloi të gjithë trupin e rrugës, duke bllokuar të dyja korsitë.

Situata aktuale dhe masat

Sipas raportimeve nga gazetarja e RTSH 24 në terren, aktualisht aksi është i pakalueshëm. Kompania mirëmbajtëse ka vendosur ndalesa fizike në të dyja skajet e rrugës, konkretisht në Qukës dhe në Qafë Plloçë, për të parandaluar hyrjen e mjeteve në zonën e rrezikut.

Kompania po punon për hapjen e një rruge alternative provizore, por deri në njoftimin e dytë, qarkullimi mbetet plotësisht i paralizuar. Drejtuesit e mjeteve këshillohen të shmangin këtë aks dhe të ndjekin rrugët e vjetra lidhëse të zonës juglindore.

/rtsh.al/