Hasimja: Përmbytjet sa herë bie shi nuk janë normale, fajtor edhe ndërtimet pa kriter

Reshjet e dendura të shiut që kanë përfshirë vendin dhe pasojat e tyre në infrastrukturë kanë qenë tema e diskutimit në emisionin “Trialog” në RTSH. Analisti Ermal Hasimja ka vënë gishtin te kaosi urban dhe ndërtimet problematike edhe si shkaktarë të situatës në qytetet e mëdha.

Gjatë bisedës me moderatoren Alba Alishani, Hasimja u shpreh se megjithëse aspektet teknike u takojnë ekspertëve, realiteti i përditshëm është i dukshëm për të gjithë: qytetet kryesore paralizohen sa herë ka reshje.

Analisti nënvizoi se situata në dy qendrat më të mëdha urbane, Tiranë dhe Durrës, është kthyer në një rregullsi shqetësuese.

“Bie shi dhe disa vende si Tirana dhe Durrësi bëhen këneta. Kjo po bëhet rregullisht dhe këtu ka një problem që ka të bëjë edhe për mënyrën e ndërtimit në Shqipëri, ku ka raste flagrante shkeljesh të ligjit,” deklaroi Hasimja.

Sipas tij, ndërtimet që nuk respektojnë kriteret urbanistike kanë bllokuar frymëmarrjen e qyteteve dhe kapacitetet shkarkuese.

Hasimja kërkoi që shteti të mos mjaftohet vetëm me menaxhimin e krizës momentale, por të ndërhyjë edhe te burimi i problemit: paligjshmëria në ndërtim.

“Shteti duhet që të marrë masa që të ndërhyjë aty ku ka shkelje. Ndodh edhe në vende të tjera që ka përmbytje, por jo sa herë që bie shi,” përfundoi analisti.

/rtsh.al/