“Blloku 33”, në pranga edhe një shtetas i shpallur në kërkim, shkon në 27 numri i të arrestuarve

Policia e Tiranës ka arrestuar një 33-vjeçar të shpallur në kërkim në kuadër të operacionit policor të koduar “Blloku 33.” Numri i të arrestuarve në kuadër të këtij operacioni ka shkuar në 27.

Policia njofton se ditën e sotme ka arrestuar në Kashar shtetasin A. B., 33 vjeç. Për të është caktuar masa e sigurisë “Arrest në burg”, për veprën penale ”Prodhimi dhe shitja e narkotikëve”.

Vijojnë kërkimet për kapjen e 6 shtetasve të tjerë të shpallur në kërkim gjatë këtij megaoperacioni.

Më 20 qershor,  Antidroga e Tiranës goditi katër grupe kriminale. Megaoperacioni i nisur nga blutë e Tiranës i koduar ‘Blloku 33’ arriti që të dokumentojë 33 persona të përfshirë në këtë veprimtari kriminale. 25 prej tyre u arrestuan më 20 qershor, ndërkohë 8 të tjerë u shpallën në kërkim nga policia (dy prej tyre tashmë janë arrestuar).

Kryesisht grupet kriminale shpërndanin dhe shisnin drogë në lokalet më të famshme të zonës së ish-Bllokut. Në mesin e të arrestuarve janë banakierë dhe kamarierë të këtyre lokaleve pasi ishin të përfshirë në këtë aktivitet. Klientët e tyre ishin persona të njohur dhe frekuentuesit e jetës së natës. Jo vetëm në ish-Bllok, por droga shitej edhe në zonat e tjera të Tiranës si në Selitë, Shkolla e Bashkuar etj.

Dy vëllezërit e arrestuar, Durim Gurzi dhe Artur Gurzi, ndërkohë vëllai i tretë është ende në kërkim, janë personat që siguronin kokainën dhe më pas e shpërndanin tek personat e tjerë të grupit.

Gjatë kontrollit fizik ndaj këtyre shtetasve dhe kontrollit në banesat e tyre janë gjetur dhe sekuestruar: 1 kg e 964 gramë kokainë, 450 gramë heroinë, 2 pistoleta, 29 celularë, 6 automjete, 4 peshore elektronike dhe shuma të konsiderueshme parash në lekë dhe euro, që dyshohet se janë përfituar nga kjo veprimtari kriminale./vizionplus.tv