Drogë me valixhe nga Tajlanda, kapen 61 kg kanabis në Rinas, arrestohen dy kinezë sapo zbritën nga avioni

Një tjetër goditje ndaj trafikut ndërkombëtar të drogës është shënuar në aeroportin e Rinasit, ku policia ka sekuestruar 61 kilogramë kanabis me përqindje të lartë THC. Lënda narkotike ishte e ndarë në 120 pako dhe e futur në dy valixheve.

Sasia e drogës ishte nisur nga Tajlanda, me tranzit në Emiratet e Bashkuara dhe si destinacion final Shqipërinë.

Ishin autoritetet e huaja që sinjalizuan policinë shqiptare e cila menjëherë sapo avioni mbërriti, ndërhynë duke arrestuar dy shtetas kinezë.

Mësohet se lënda narkotike kishte përmbajtje të lartë THC, çka e bën atë më të shtrenjtë nëse do të hidhej në treg.

Gjatë këtij viti policia ka zbuluar dhe goditur 12 raste të kanabisit me përqindje të lartë THC.

Ngarkesat e drogës kanë ardhur kryesisht me postë nga Tajlanda, Shtetet e Bashkuara të Amerikës dhe Kanadaja./vizionplus.tv