Dy të rinj kapen me kokainë dhe kanabis në Fier – Policia sekuestron qindra doza gati për shitje

Policia e Fierit ka arrestuar në flagrancë dy shtetas, T. F., 26 vjeç, dhe A. H., 29 vjeç, banues në fshatin Grabian, Divjakë, pasi u kapën duke shpërndarë lëndë narkotike. 

Sipas hetimeve, dyshohet se këta persona siguronin lëndë narkotike në sasi të konsiderueshme, të cilën më pas e ndanin në doza dhe e përgatisnin për shitje në zona të ndryshme. 

Operacioni policor i koduar “Flagranca” u finalizua nga specialistët e Sektorit për Hetimin e Narkotikëve, në bashkëpunim me Forcën e Posaçme “Operacionale”. Shërbimet e Policisë ndërhynë në momentin që të rinjtë po lëviznin me automjet në fshatin Grabian, duke i kapur me lëndë narkotike të ndarë në doza, gati për shitje. 

Gjatë kontrollit fizik dhe në banesa u gjetën dhe u sekuestruan dhjetëra doza kokainë dhe kanabis, një automjet i përdorur për transport, një grirëse për përpunimin e lëndës narkotike, një peshore elektronike dhe 3 aparate celularë. 

Materialet procedurale i kaluan Prokurorisë pranë Gjykatës së Juridiksionit të Përgjithshëm Fier, për veprime të mëtejshme.

/rtsh.al/