“Është koha!!!!”/ Mbretëresha e Krishtlindjeve “ndez” shpirtin e festave, Mariah Carey publikon videon, nis zyrtarisht sezoni festiv

Mariah Carey ka shpallur zyrtarisht nisjen e sezonit festiv të këtij viti, duke vijuar traditën e saj të përvitshme me një video të veçantë në rrjetet sociale. Menjëherë pas përfundimit të Halloween-it, këngëtarja publikoi klipin që fansat e presin çdo vit, të shoqëruar me mesazhin karakteristik: “Është koha!”.

Videoja nis në Nju Jork, më 31 tetor, me një numërim mbrapsht që fillon në orën 23:58. Carey shfaqet në një lokal ku po zhvillohet një koncert punk rock, me grim të rëndë dhe pamje krejt ndryshe nga imazhi i saj festiv, teksa interpreton këngën “Hermit”.

Kjo këngë është pjesë e albumit “Someone’s Ugly Daughter”, të cilin Mariah Carey e shkroi dhe e regjistroi në mesin e viteve ’90, duke kontribuar edhe në prodhimin e tij. Albumi u publikua nën emrin e grupit “Chick”, në bashkëpunim me mikeshën e saj Clarissa Dane. Këngëtarja e zbuloi përfshirjen e saj në këtë projekt vetëm në vitin 2020, përmes autobiografisë.

Në momentin që ora shënon mesnatën dhe kënga përfundon, Carey shfaqet me zërin e saj karakteristik dhe thotë frazën tashmë të famshme: “It’s time!”. Skena transformohet në një peizazh dimëror, ku këngëtarja shfaqet në majë të një peme gjigante Krishtlindjesh, duke interpretuar hitin e saj ikonik “All I Want for Christmas Is You”.

Kënga u publikua në vitin 1994, në albumin e parë festiv të Carey-t, “Merry Christmas”, dhe prej atëherë është kthyer në një prej simboleve muzikore të festave të fundvitit. Ajo rikthehet çdo vit në krye të klasifikimeve muzikore, ndërsa dëgjohet në mbarë botën gjatë periudhës së Krishtlindjeve.

“All I Want for Christmas Is You” mbajti gjithashtu rekordin për qëndrimin më të gjatë në vendin e parë të Billboard Hot 100, me 22 javë jo të njëpasnjëshme, përpara se rekordi t’i merrej këtë vit nga kënga “Choosin’ Texas” e Ella Langley.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb

Më shumë nga Aktualitet