FOKUS – BE kërkon ndihmën e SHBA-së për të stabilizuar çmimet e energjisë mes konfliktit Izrael-Iran

KANANASKIS, 16 qershor /ATSH-DPA/- Bashkimi Evropian synon të bashkëpunojë me Shtetet e Bashkuara të Amnerikës për të parandaluar një rritje të ndjeshme të çmimeve të energjisë – të shkaktuar nga konflikti midis Izraelit dhe Iranit.

Duke folur dje përpara ditës zyrtare të hapjes së samitit të Grupit të Shtatë vendeve (G7) – që udhëheqin demokracitë e industrializuara në Kanada, presidentja e Komisionit Evropian Ursula von der Leyen tha se e kishte diskutuar çështjen me presidentin e SHBA-së Donald Trump dhe se ata ishin të përgatitur të koordinoheshin me partnerë “me të njëjtat mendje” për të siguruar stabilitetin e tregut.

Ajo tha se BE ishte vigjilente në lidhje me ndikimin e konfliktit në tregjet ndërkombëtare të energjisë.

Von der Leyen nuk specifikoi se cilat masa po shqyrtoheshin për të kundërshtuar luhatjet e mëdha të çmimeve.

Në teori, rezervat strategjike të naftës mund të lirohen ose të kërkohen bisedime me vendet kryesore eksportuese të naftës.

Efektet e konfliktit tashmë po ndihen në Gjermani, ku çmimet e benzinës dhe naftës u rritën ndjeshëm gjatë fundjavës, sipas shifrave nga shoqata e automobilave ADAC.

Rritjet vijnë mes raporteve nga Irani se sulmet ajrore izraelite kanë synuar infrastrukturën kryesore të naftës dhe gazit, duke nxitur frikën e ndërprerjeve më të gjera të furnizimeve. //a.i/