FOKUS – Izraeli kërcënon pasardhësit e Khameneit, përshkallëzohet lufta në vendet e Gjirit

TEL AVIV, 8 mars /ATSH/- Izraeli ka paralajmëruar se do të shënjestrojë çdo pasardhës të mundshëm të udhëheqësit suprem të Iranit, Ajatollah Ali Khamenei, ndërsa konflikti mes dy vendeve hyn në javën e dytë dhe tensionet në rajon vazhdojnë të rriten, sipas BBC.

Gjatë natës, Irani goditi gjatë një sulmi me dron një ndërtesë qeveritare në Kuvajt, duke shkaktuar një zjarr të madh. Sulme të tjera janë raportuar në disa zona të Gjirit, ndërsa përplasjet mes palëve po zgjerohen në rajon.

Në Iran, depo të naftës u goditën nga bombardime të forta ajrore. Banorët raportuan disa shpërthime të fuqishme dhe thanë se u zgjuan në mëngjes nën një qiell të errësuar nga tymi i dendur që mbuloi zonën.

Pamjet e publikuara nga vendi i ngjarjes tregojnë një rrugë në flakë në Teheran pas goditjes së një depoje nafte. Në video dëgjohet një banor që thotë se dyqane dhe shtëpi në zonë janë përfshirë nga zjarri.

Ndërkohë, Izraeli ka paralajmëruar banorët në jug të Libanit të largohen nga zonat e tyre, ndërsa ushtria izraelite ka njoftuar se po përgatit sulme kundër Hezbollahut, grupit të armatosur të mbështetur nga Irani. /Ad.Ab./