GJENEVË – OKB-ja kërkon hapjen e të gjitha pikave kufitare në Rripin e Gazës

GJENEVË, 10 tetor /ATSH-DPA/ – Organizata e Kombeve të Bashkuara ka bërë thirrje për hapjen e të gjitha kalimeve kufitare drejt Rripit të Gazës, njoftuan sot në Gjenevë përfaqësues të disa agjencive humanitare të OKB-së.

Në këtë apel përfshihen Organizata Botërore e Shëndetësisë (OBSH), UNICEF dhe Agjencia e OKB-së për Refugjatët Palestinezë (UNRWA).

Izraeli ndërpreu bashkëpunimin me UNRWA-n në fillim të vitit, pjesërisht për shkak të akuzave për lidhje të afërta me grupin militant Hamas.

Zëdhënësja e UNRWA-së, Juliette Touma, deklaroi se punimet humanitare në Gaza janë të pamundura pa rrjetin prej 12 000 punonjësish të agjencisë, të cilët vazhdojnë të punojnë pavarësisht bojkotit izraelit.

Ajo shtoi se UNRWA mbetet organizata më e madhe humanitare në Gaza.

Izraeli kontrollon hyrjen dhe daljen nga Gaza dhe duhet të japë miratimin për dërgimin e ndihmave dhe të garantojë sigurinë e autokolonave humanitare. Ende nuk është e qartë në çfarë mënyre UNRWA do të përfshihet në shpërndarjen e ndihmave. /Ad.Ab./