GJERMANI – Ministrat evropianë mbështesin politikën e rreptë të emigracionit në një deklaratë të përbashkët

MYNIH, 18 korrik /ATSH/- Ministri i Brendshëm i Gjermanisë, Alexander Dobrindt, dhe pesë homologë evropianë ranë dakord sot për një sërë objektivash për të shtrënguar rregullat e azilit në bllok, duke përfshirë lejimin e deportimeve në Afganistan dhe Siri.

Takimi në majën më të lartë të Gjermanisë, Zugspitze, vjen pas vendimit të Berlinit në maj për të refuzuar azilkërkuesit në kufi, një politikë që thuhet se ishte koordinuar me vendet fqinje, por që shkaktoi kritika të konsiderueshme.

Dobrindt u takua me homologët e tij nga Franca, Polonia, Austria, Republika Çeke dhe Danimarka, si dhe me komisionerin e BE-së për Çështjet e Brendshme Magnus Brunner.

Objektivat e politikës së azilit të dakordësuara sot, të cilat kërkojnë miratimin e Brukselit, përfshijnë heqjen e pengesave legjislative për transferimin e azilkërkuesve të refuzuar në qendra të sigurta jashtë BE-së dhe mundësimin e procedurave të azilit në vendet e treta.

“Ne ndajmë bindjen se Evropa duhet të veprojë me vendosmëri dhe unitet për të reduktuar në mënyrë efektive emigracionin e paligjshëm”, sipas një dokumenti të përbashkët të publikuar nga Ministria e Brendshme gjermane.

“Deportimet në vende të tilla si Afganistani dhe Siria duhet të rivendosen si praktikë standarde, me qytetarët nga vendet që nuk bashkëpunojnë për deportimet për t’u përballur me kufizimet e vizave”, thuhet në dokument.

Takimi vjen pasi qeveria e re e Gjermanisë deportoi sot 81 afganë drejt vendit të tyre të origjinës – duke shënuar hapin e fundit në përpjekjen e qeverisë për të goditur emigracionin e paligjshëm që kur mori detyrën në maj. //a.i/