Gjermania: Irani të angazhohet në bisedime me SHBA-të për të ndaluar grupet e armatosura

Ministri i Jashtëm i Gjermanisë, Johann Wadephul, ka deklaruar se Irani duhet të angazhohet në negociatat me Shtetet e Bashkuara për të ndaluar mbështetjen për grupet e armatosura proxy si Hamasi në Gaza, Hezbollah në Liban dhe Houthit në Jemen.

Duke folur në një konferencë për shtyp bashkë me homologun belg, Maxime Prévot ai shtoi se Gjermania ka një përgjegjësi të veçantë për sigurinë e shtetit të Izraelit.

Kjo deklaratë vjen në një kohë tensionesh të larta në Lindjen e Mesme, ku Irani akuzohet gjerësisht nga Perëndimi për financimin dhe armatosjen e këtyre grupeve, të cilat Gjermania dhe aleatët e saj i konsiderojnë si kërcënim për stabilitetin rajonal dhe sigurinë e Izraelit.

Wadephul ka qenë konsistent në qëndrimin e tij të ashpër ndaj Iranit, duke mbështetur masa si etiketimin e Gardës Revolucionare Islamike (IRGC) si organizatë terroriste nga BE-ja.

Ky pozicion pasqyron politikën e Gjermanisë për të mbështetur fuqishëm Izraelin dhe për të kërkuar de-përshkallëzim përmes diplomacisë, por me kushte të qarta ndaj Teheranit, sidomos në negociatat indirekte ose të ndërmjetësuara me SHBA-në rreth çështjeve bërthamore dhe rajonale.

/rtsh.al/