Gjermania prezanton planin për raketa të reja Taurus NEO, Suedia dhe Spanja mund të bashkohen

Gjermania pritet të nisë prodhimin e një versioni të përmirësuar të raketës lundruese Taurus në vitin 2029, sipas një propozimi buxhetor të parë nga Reuters, i cili pritet të miratohet nga parlamenti javën e ardhshme.

Forcat gjermane aktualisht disponojnë rreth 600 raketa Taurus me një rreze zyrtare mbi 500 km, të cilat lëshohen nga avionë luftarakë si Tornado, F-15 dhe F-18. Këto armë, të ndërtuara nga kompania evropiane e mbrojtjes MBDA, janë projektuar për të shkatërruar objektiva me vlerë të lartë pas vijës së frontit, si bunkerë komandimi, depo municionesh e karburanti, pista ajrore dhe ura.

Qeveria gjermane ka refuzuar vazhdimisht kërkesat e Ukrainës për furnizim me raketa Taurus, për shkak të shqetësimeve mbi rrezen e gjatë dhe përdorimin e mundshëm kundër objektivave brenda territorit rus.

Versioni i ri, Taurus NEO, i përfshirë në një propozim buxhetor prej 415 milionë eurosh, do të ketë rreze të zgjeruar, mbrojtje të përmirësuar ndaj ndërhyrjeve, si dhe avancime në teknologjinë e navigimit dhe kokën kërkuese.

Saab nga Suedia dhe Williams International nga SHBA janë identifikuar si nënkontraktorët kryesorë, ndërsa në një fazë të mëvonshme mund të bashkohen edhe Suedia dhe Spanja.

Sipas të dhënave të mëparshme, Gjermania synon të blejë rreth 600 raketa Taurus NEO me një kosto totale prej afërsisht 2 miliardë euro.

Nga ana tjetër, Kremlini ka paralajmëruar se dërgimi i raketave Taurus në Ukrainë do të sillte një raund të ri “tensioni spirale” në konfliktin ruso-ukrainas.

/rtsh.al/