Gjykata e Posaçme dënon me 7 vjet e 4 muaj burg Erio Zejnon për sigurim të kushteve për vrasje

Gjykata e Posaçme e Shkallës së Parë për Korrupsionin dhe Krimin e Organizuar ka shpallur sot vendimin ndaj të pandehurit Erio Zejno, i cili akuzohej për përfshirje në aktivitete kriminale të strukturuara. Trupi gjykues, i përbërë nga gjyqtarët Flora Hajredinaj, Irena Gjoka dhe Marinela Osmani, e ka deklaruar të pandehurin fajtor për disa vepra të rënda penale, duke e dënuar përfundimisht me 7 vjet e 4 muaj burgim.

Prokuroria e Posaçme kishte ngritur një sërë akuzash ndaj Zejnos, ndër të cilat më kryesorja ishte ajo e “Sigurimit të kushteve dhe mjeteve materiale për të kryer vrasje”, në dëm të shtetasve të identifikuar si E.M. dhe I.H.

Në vendimin e saj, gjykata ka bërë bashkimin e dënimeve për veprat:

Sigurim i kushteve për vrasje, me 7 vjet burgim.

Mbajtje pa leje e armëve dhe municioneve me 10 vjet burgim.

Pjesëmarrje në grup të strukturuar kriminal me 2 vjet burgim.

Pas aplikimit të nenit 55 të Kodit Penal për bashkimin e dënimeve dhe reduktimit të masës me 1/3 për shkak të gjykimit të shkurtuar, i pandehuri u dënua me 7 vjet e 4 muaj burgim, të cilin do ta vuajë në një institucion të sigurisë së lartë.

Përveç dënimit me burgim, gjykata ka vendosur që i pandehuri të mbajë përgjegjësi edhe për shpenzimet procedurale të kryera gjatë fazës së hetimit paraprak, në shumën prej 37,785 lekësh, në mënyrë solidare me bashkëpandehurit e tjerë të të njëjtit procedim penal (nr.148/1 të vitit 2024).

Palët kanë të drejtë të ushtrojnë ankim kundër këtij vendimi pranë Gjykatës së Posaçme të Apelit për Korrupsionin dhe Krimin e Organizuar, brenda një afati 15-ditor, duke filluar nga dita e nesërme e komunikimit të vendimit të arsyetuar.

/rtsh.al/