Hita në Lezhë: Parandaluam dy ngjarje të rënda kriminale, vijoni punën me vendosmëri - ATSH -

TIRANË, 6 nëntor /ATSH/ Drejtori i përgjithshëm i Policisë së Shtetit, Skënder Hita zhvilloi sot një vizitë në Drejtorinë Vendore të Policisë Lezhë. Gjatë takimit, Hita vlerësoi veçanërisht punën hetimore dhe operacionale të strukturave policore, falë së cilës u bë i mundur parandalimi i dy ngjarjeve shumë të rënda kriminale, duke shmangur rrezikun për jetën e qytetarëve.

“Parandalimi i dy ngjarjeve shumë të rënda kriminale është rezultat i punës, përkushtimit, motivimit dhe vendosmërisë suaj”, tha kreu i Policisë së Shtetit.

“Keni arritur të identifikoni dhe të kapni persona me rrezikshmëri të lartë, të cilët dyshohet se do të vepronin ndaj personave konkretë. Edhe ngjarja e ndodhur dy ditë më parë, me lëndë eksplozive në qytetin tuaj, është dokumentuar dhe hetimet kanë ecur në drejtimin e duhur. Të gjitha këto rezultate shërbejnë për të fituar besimin e qytetarëve dhe për të dhënë më të mirën për këtë qytet”, tha Hita.

Hita kërkoi që i njëjti përkushtim dhe vendosmëri të vijojnë edhe në përmbushjen e detyrave të tjera, duke vënë theksin veçanërisht te siguria në shkolla.

“Siguria në shkolla dhe perimetri i sigurisë në këto institucione janë të pazëvendësueshme. Dua të përkushtoheni më shumë dhe të kërkoni më shumë nga vetja, në mënyrë që rastet e shitjes së lëndëve narkotike pranë shkollave, të marrin goditjen e duhur edhe nga ana juaj. Dua që rezultatet e mira që keni arritur të vijojnë dhe të shoqërohen me vëmendje edhe më të shtuar nga të gjithë ju”, theksoi ai.

Hita kërkoi konsolidimin e mëtejshëm të strukturave të DVP Lezhë, duke i inkurajuar punonjësit e Policisë që të vijojnë me profesionalizëm, përgjegjshmëri dhe vendosmëri në përmbushjen e misionit të tyre për sigurinë e qytetarëve në të gjithë qarkun.

Drejtori i DVP Lezhë, Drejtues i Parë Ermal Muçaj, falënderoi Drejtorin e Përgjithshëm për mbështetjen e vazhdueshme me efektivë dhe mjete, duke garantuar se strukturat vendore do të vijojnë të japin maksimumin për përmbushjen e detyrave.

Drejtori i Përgjithshëm i Policisë së Shtetit vizitë në Drejtorinë Vendore të Policisë Lezhë

1 nga 7

/e.i/r.e/a.f/

Sipas Ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar Agjencinë Telegrafike Shqiptare.