INDI – Ligji i ri ngjall polemika: Të konvertuarit në fe të tjera humbasin statusin e kastave dhe tribuve

NJU DELHI, 24 mars /ATSH-ANSA/ – Një kolegj i Gjykatës së Lartë së Indisë ka vendosur që personat që praktikojnë fe të tjera përveç hinduizmit, sikhizmit dhe budizmit nuk do të konsiderohen më pjesë e “Scheduled Castes” dhe “Scheduled Tribes”,(tributë dhe kastat e njohura në vend) kategori që përfitojnë mbrojtje dhe privilegje të veçanta nga Kushtetuta e Indisë.

Vendimi konfirmon një qëndrim të mëparshëm të Gjykatës së Lartë së Andhra Pradesh nga viti 2025, e cila kishte refuzuar kërkesën për mbrojtje të një prifti të krishterë.

Sipas gjykatës, një person që konvertohet në një fe tjetër nuk mund të përfitojë nga masat ligjore që synojnë luftimin e diskriminimit mbi bazë kaste, pasi këto lidhen historikisht me strukturën shoqërore hindu.

Ky vendim ka ndezur debat të fortë në Indi.

Kritikët theksojnë se, ndërsa budizmi e refuzon sistemin e kastave, në komunitete të tjera fetare, si ai mysliman në Indi, ekzistojnë gjithashtu forma hierarkie sociale.

Një shembull është grupi i njohur si “Arzal”, që konsiderohet i margjinalizuar dhe shpesh krahasohet me Dalitët, të njohur ndryshe si “paria”.

Analistët paralajmërojnë se vendimi mund të ketë pasoja të rëndësishme sociale dhe ligjore, duke prekur mijëra persona që janë konvertuar ndër vite dhe që deri më tani kanë përfituar nga këto mbrojtje kushtetuese.   /os/