Izraeli do të hapë pikën kufitare Rafah që lidh Egjiptin me Rripin e Gazës

Izraeli njoftoi të premten se do të rihapë pikën kufitare të Gazës me Egjiptin në të dyja drejtimet gjatë fundjavës, duke u lejuar palestinezëve të hyjnë dhe të dalin nga territori pas gati dy vitesh mbylljeje.

COGAT, autoriteti ushtarak izraelit përgjegjës për koordinimin e ndihmës për Gazën, tha të premten se do të lejohet vetëm lëvizja e kufizuar e personave.

Rihapja e pikës kufitare Rafah do të shënojë një hap të madh përpara për planin e armëpushimit në Gaza të Presidentit të SHBA-së Donald Trump.

Pika kufitare, porta kryesore e Gazës me botën e jashtme, është mbyllur kryesisht që nga maji i vitit 2024.

Si Izraeli ashtu edhe Egjipti do të kontrollojnë njerëzit që hyjnë dhe dalin nga pika e kalimit, e cila do të mbikëqyret nga rojet kufitare të Bashkimit Evropian.

Palestinezët që ikën nga Gaza gjatë luftës do të jenë në gjendje të kthehen pas miratimit nga autoritetet izraelite të sigurisë.

Izraeli kishte rezistuar ndaj rihapjes së pikës së kalimit, por gjetja e mbetjeve të pengut të fundit në Gaza të hënën hapi rrugën që procesi të ecë përpara.

/rtsh.al/