KE miratoi Paketën e Zgjerimit për vitin 2026: Shqipëria vazhdon të bëjë përparim drejt anëtarësimit në BE - ATSH -

TIRANË, 4 nëntor/ATSH/ Komisioni Evropian miratoi sot Paketën e tij vjetore të Zgjerimit, duke vlerësuar progresin e bërë nga partnerët e zgjerimit gjatë vitit të kaluar dhe duke përcaktuar prioritetet e reformave për të ardhmen.

Zgjerimi është një nga politikat më të rëndësishme të BE-së që ankoron paqen, stabilitetin dhe prosperitetin në të gjithë kontinentin. E ndërtuar fort mbi parimin e meritave, një politikë e besueshme e zgjerimit është gjithnjë e më shumë një investim në sigurinë kolektive të Evropës.

Paketa e këtij viti tregon se përpjekjet e qëndrueshme për reforma përkthehen në përparim konkret drejt anëtarësimit në BE, siç dëshmohet nga Mali i Zi, Shqipëria, Moldavia dhe Ukraina. Katër vendet kanë avancuar me negociatat e tyre të anëtarësimit, me hapjen e grupkapitujve dhe mbylljen provizore të kapitujve me një ritëm të paprecedentë.

Duke e çuar këtë punë përpara, dhe siç u njoftua nga presidentja Von der Leyen në fjalimin e saj mbi Gjendjen e Unionit 2026, Komisioni po prezanton sot udhërrëfyes indikativë për këto katër vende negociuese më të përparuara, duke përcaktuar piketa konkrete për vitin e ardhshëm.

Ursula von der Leyen, presidente e Komisionit Evropian, tha se, “progresi i rëndësishëm i arritur nga disa kandidatë gjatë vitit të kaluar na lejon ta kthejmë premtimin e zgjerimit në realitet. Tani po propozojmë një sërë udhërrëfyesish indikativë për vendet negociuese më të përparuara – Mali i Zi, Shqipëria, Ukraina dhe Moldavia. Një rrugë e qartë për vitin e ardhshëm dhe një spirancë e fortë për negociatat e ardhshme. Hap pas hapi, po ndërtojmë një Bashkim më të plotë dhe më të fortë”.

Raportet tregojnë se ritmi i reformave, veçanërisht në fushat e demokracisë, sundimit të ligjit dhe të drejtave themelore, së bashku me zgjedhjet politike në siguri dhe mbrojtje, si dhe progresi drejt konvergjencës ekonomike, formëson drejtpërdrejt shpejtësinë e procesit të anëtarësimit për secilin partner. Reformat, investimet dhe integrimi gradual i partnerëve të zgjerimit tashmë po forcojnë aftësinë e Bashkimit Evropian për të mbrojtur interesat e tij, për të zvogëluar dobësitë dhe për të krijuar mundësi të reja. Për të maksimizuar këto përfitime përpara anëtarësimit, Komisioni po prezanton sot gjithashtu një kornizë të përbashkët për integrimin gradual për të thelluar më tej integrimin në sektorët strategjikë, siç janë energjia, transporti, digjitalizimi dhe mbrojtja. Kjo do ta bëjë integrimin gradual më të strukturuar dhe më koherent.

Ndërsa partnerët e zgjerimit përparojnë në rrugët e tyre të reformave, BE-ja duhet të jetë e gatshme t’i mirëpresë ata dhe t’i përgjigjet ritmit të progresit të tyre.

Me Komunikatën e fundit “Përgatitja për një Bashkim Evropian më të gjerë”, Komisioni ka hedhur themelet për të siguruar që një Bashkim Evropian më i madh të jetë gjithashtu më i fortë, më elastik dhe më efektiv.

Sa i takon përfundimeve kryesore theksohet se Shqipëria vazhdon të bëjë përparim drejt anëtarësimit në BE.

Gjatë periudhës raportuese, ajo hapi grupkapitullin e fundit të mbetur, përmbushi standardet e përkohshme për kapitujt e sundimit të ligjit, duke hapur rrugën për mbylljen e përkohshme të katër kapitujve. Tani nevojiten përpjekje të vazhdueshme për të gjithë kapitujt e mbetur. Arritja e objektivit ambicioz, por të arritshëm të Shqipërisë për të përfunduar negociatat e anëtarësimit deri në vitin 2027 kërkon ruajtjen e vrullit të reformave dhe nxitjen e dialogut politik gjithëpërfshirës. Ruajtja e vrullit do të kërkojë zbatim të shpejtë të reformave me cilësi të lartë që lidhen me BE-në.

Në të njëjtën kohë, periudha raportuese pa mobilizimin më të madh qytetar të vendit që nga tranzicioni i saj demokratik. Anëtarësimi në BE është një qasje e të gjithë shoqërisë që kërkon dialog konstruktiv.

Udhërrëfyes të qartë drejt anëtarësimit në BE

Në dritën e progresit të arritur nga Mali i Zi , Shqipëria, Moldavia dhe Ukraina, Komisioni prezantoi sot udhërrëfyes indikativë me objektiva dhe synime konkrete për vitin e ardhshëm.

Duke u bazuar në përvojat e kaluara, veçanërisht nga zgjerimet e viteve 2004 dhe 2013, ato do të ndihmojnë për organizimin e fazave të ardhshme të përgatitjes në mënyrë më të strukturuar dhe transparente, duke mbështetur punën si të vendeve kandidate ashtu edhe të institucioneve dhe Shteteve Anëtare të BE-së. Komisioni mund t’i përshtatë udhërrëfyesit, në varësi të progresit të bërë në përmbushjen e kushteve të kërkuara, si dhe do t’i përditësojë ato rregullisht, bazuar në progresin e bërë. Komisioni është i gatshëm të paraqesë udhërrëfyes të ngjashëm për vendet e tjera kandidate pasi ato të kenë arritur një nivel të ngjashëm përparimi, ritmi dhe angazhimi në negociatat e anëtarësimit.

Përgatitja për anëtarësim përmes integrimit gradual

Komunikata e fundit e Komisionit “Përgatitja për një Bashkim Evropian më të gjerë” thekson nevojën për të përforcuar integrimin gradual të partnerëve të anëtarësimit ndërsa përparojnë drejt anëtarësimit në BE. Për këtë qëllim, Komisioni prezantoi sot një hartë të instrumenteve ekzistuese që ofron një bazë për identifikimin e mundësive për të thelluar integrimin në sektorët strategjikë, duke përfshirë energjinë, transportin, digjitalizimin dhe mbrojtjen. Në varësi të kushteve, integrimi gradual i përforcuar do të nxisë më tej rritjen, konkurrueshmërinë dhe sigurinë, duke mbetur një pjesë integrale e procesit të anëtarësimit. Hartëzimi synon të sigurojë koherencë, parashikueshmëri dhe kthyeshmëri më të madhe, duke mundësuar një integrim më të strukturuar që sjell përfitime të qarta për partnerët e zgjerimit dhe BE-në. Gjatë gjashtë muajve të ardhshëm, Komisioni do të nisë dialogë mbi integrimin gradual me partnerët e zgjerimit për të vlerësuar masat ekzistuese dhe financimin e tyre, si dhe për të identifikuar mundësi më të përshtatura për secilin partner.

Hapat e ardhshëm

Tani i takon Këshillit të shqyrtojë rekomandimet e sotme të Komisionit dhe të marrë vendime mbi hapat e ardhshme në procesin e zgjerimit.

Zgjerimi është një proces i bazuar në meritë, i bazuar në progresin objektiv të secilit vend në zgjerim. BE mbështet forcimin e institucioneve, qeverisjes demokratike dhe reformave të administratës publike në të gjitha këto vende.

Në Komunikatën e fundit “Përgatitja për një Bashkim Evropian më të gjerë”, Komisioni paraqiti rishikimet e politikave para zgjerimit, si dhe orientimet dhe veprimet e politikave të nevojshme për ta përgatitur Bashkimin Evropian për zgjerimet e ardhshme. Kjo tregoi se përgatitja e institucioneve të BE-së, përshtatja e politikave të Bashkimit Evropian me realitetet e reja dhe garantimi që buxheti i BE-së të pasqyrojë ambiciet tona të përbashkëta. Komunikata gjithashtu përshkroi se si traktatet e ardhshme të anëtarësimit duhet të përmbajnë edhe masa mbrojtëse për të garantuar që angazhimet kryesore të marra gjatë negociatave të vazhdojnë të mbahen edhe pas anëtarësimit.

Integrimi gradual u mundëson vendeve të zgjerimit të përgatiten për anëtarësim përmes pjesëmarrjes më të hershme në politikat e BE-së. Partnerët mund të përfitojnë nga qasja më e gjerë në programet dhe agjencitë e BE-së, lidhshmëria, si dhe të marrin pjesë në grupe dhe komitete ekspertësh edhe para anëtarësimit. Për më tepër, nisma si Plani i Rritjes prej 6 miliardë eurosh për Ballkanin Perëndimor, Plani i Rritjes prej 1,9 miliardë eurosh për Moldavinë dhe Instrumenti prej 50 miliardë eurosh për Ukrainën, lejojnë integrim më të gjerë të tregut të përbashkët dhe krijojnë lidhje më të forta me BE-në, siç është përmes integrimit gradual dhe pjesëmarrjes në SEPA dhe “Roam Like at Home”.

Çdo zgjerim e ka bërë Bashkimin tonë më të fortë. Kur dhjetë vende iu bashkuan BE-së në vitin 2004, kjo shënoi zgjerimin më të madh ndonjëherë. Në dy dekadat që nga ajo kohë, anëtarët e rinj kanë parë standardet e jetesës të dyfishohen, papunësinë të bjerë gati në gjysmë, jetëgjatësinë të rritet nga 75 në 79 vjet, varfërinë dhe përjashtimin social të bien ndjeshëm dhe të krijohen 6 milionë vende të reja pune. Për anëtarët ekzistues, tregtia është shumëfishuar më shumë se pesëfish që atëherë, ndërsa janë krijuar edhe 20 milionë vende pune. Për BE-në në tërësi, Tregu i Përbashkët fitoi 74 milionë konsumatorë të rinj në atë kohë dhe ekonomia e BE-së është zgjeruar me 27%, pavarësisht krizave globale.

/gj.m/r.e/a.f/

Sipas Ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar Agjencinë Telegrafike Shqiptare.