Kozeli inspekton punimet në aksin Papër-Ura e Grykshit, projekti arrin 61% realizim

TIRANË, 10 mars/ATSH/ Drejtori i Autoritetit Rrugor Shqiptar, Ami Kozeli, inspektoi ecurinë e punimeve në aksin rrugor Papër- Ura e Grykshit, pjesë e Korridorit VIII.

Gjatë inspektimit u bë e ditur se punimet në lotin 2 po vijojnë me ritme të mira, ndërsa realizimi fizik i projektit ka arritur në rreth 61%.

Segmenti rrugor, me gjatësi rreth 8 kilometra dhe i ndarë në tre faza, nis pranë kryqëzimit të Cërrikut dhe përfundon në zonën e Grykshit të Madh.

Projekti parashikon ndërtimin e tre urave, dy nënkalimeve, si dhe realizimin e tombino box dhe një rrethoreje, duke përmirësuar ndjeshëm infrastrukturën dhe sigurinë rrugore në këtë aks.

Sipas Kozelit, tashmë ka përfunduar hapja e trasesë së rrugës në të tre fazat e projektit, ndërsa është realizuar edhe vendosja e një pjese të trarëve të urave.

Aktualisht, punimet po vijojnë me vendosjen e trarëve të tjerë dhe ndërtimin e veprave të vogla të artit, duke avancuar çdo ditë realizimin e këtij projekti të rëndësishëm për zhvillimin e infrastrukturës rrugore. /j.p/

1 nga 6