LONDËR – Britania e Madhe, presion më të fortë ndaj Rusisë
LONDËR, 24 tetor /ATSH/ – Britania e Madhe ka kërkuar sot një sërë masash kundër Rusisë për të forcuar pozicionin e Ukrainës para bisedimeve të ardhshme për paqen, ndërsa presidenti ukrainas Volodymyr Zelensky udhëton drejt Londrës për takime me aleatë kryesorë, sipas “Reuters”.
Zyra e kryeministrit britanik Keir Starmer tha se ai do të kryesojë një takim të “Koalicionit të të Gatshmëve”, ku vendet pjesëmarrëse që kanë premtuar të forcojnë mbështetjen për Ukrainën do të diskutojnë heqjen e naftës dhe gazit rus nga tregjet globale, përdorimin e aseteve të ngrira ruse për të mbështetur Ukrainën dhe dërgimin e raketave me rreze të gjatë.
Takimi vjen pas vendosjes së sanksioneve nga presidenti amerikan Donald Trump ndaj dy kompanive më të mëdha ruse të naftës, një kthesë dramatike nga plani i tij i mëparshëm për të zhvilluar një samit me presidentin rus Vladimir Putin në Budapest për të përfunduar luftën në Ukrainë.
“Putin nuk ka treguar seriozitet për të përfunduar luftën”, tha Starmer.
“Herë pas here i ofrojmë Putin mundësinë për të ndaluar pushtimin e tij të panevojshëm, për të ndaluar vrasjet dhe për të tërhequr trupat e tij, por ai refuzon këto propozime dhe çdo mundësi për paqe”, shtoi Starmer në një deklaratë. “Duhet të rrisim presionin ndaj Rusisë dhe të ndërtojmë mbi veprimet vendimtare të presidentit Trump.”
Takimet e sotme në Londër do të jenë një kombinim i pjesëmarrjes në vend dhe virtualisht, me sekretarin e NATO-s Mark Rutte, kryeministrin holandez Dick Schoof dhe kryeministren daneze Mette Frederiksen që pritet të bashkohen me Starmer dhe Zelensky. /Ad.Ab./