Yjet e NBA-së dhe mafia midis dhjetëra të arrestuarve në operacionin kundër lojërave të fatit të paligjshme
LONDËR, 24 tetor /ATSH/- Një lojtar dhe trajner i NBA-së ishte midis dhjetëra personave të arrestuar – si pjesë e një hetimi gjithëpërfshirës të FBI-së për bastet e paligjshme sportive dhe lojërat e dyshuara të manipuluara të pokerit të lidhura me mafian, sipas BBC.
Lojtari i “Miami Heat”, Terry Rozier, dhe trajneri i “Portland Trail Blazers”, Chauncey Billups, u përmendën dje nga prokurorët federalë në dy aktakuza të ndara. Rozier dhe Billups i kanë mohuar akuzat.
Rozier, 31 vjeç, është midis gjashtë personave të arrestuar për parregullsi në baste.
Billups, një lojtar i “Hall of Fame” i kthyer në trajner, është një nga 31 personat e akuzuar në një rast të veçantë të lojës së paligjshme të pokerit që përfshin lojtarë që kanë ndaluar së luajturi dhe mafian.
Ky rast, për të cilin prokurorët thanë se përfshinte katër nga pesë familjet kryesore të krimit në Nju Jork, zbuloi një skemë të dyshuar për të joshur viktimat të luanin lojëra të manipuluara pokeri së bashku me yje të sportit të profilit të lartë përpara se të vidhnin miliona dollarë.
“Ata e bënë këtë duke përdorur teknologji, duke përfshirë lente kontakti speciale dhe syze që mund të lexonin letra të paracaktuara dhe një tavolinë me rreze X”, sipas autoriteteve.
NBA tha në një deklaratë se Rozier dhe Billups do të liroheshin menjëherë, ndërsa shqyrtoheshin aktakuzat federale.
“Ne i marrim këto akuza me seriozitetin më të madh dhe integriteti i lojës sonë mbetet përparësia jonë kryesore”, tha NBA.
Terry Rozier u paraqit dje në gjykatën federale në Orlando, Florida, dhe u lirua me kusht pasi vendosi shtëpinë e tij në Florida – me vlerë 6 milionë dollarë (4,5 milionë paund) – si kolateral.
Billups, i cili ka qenë trajner i “Portland Trail Blazers” që nga viti 2021, u arrestua në Portland, Oregon, dhe u paraqit dje në gjykatë.
Ai pritet të përgatisë edhe një garanci të konsiderueshme për lirimin e tij.
Ndeshjet e NBA-së nën shqyrtim
Prokurorët thanë se çështja e parë përfshinte lojtarë dhe bashkëpunëtorë që dyshohet se përdorën informacione që nuk ishin të disponueshme për publikun – për të manipuluar bastet në platformat kryesore të lojërave të fatit.
Prokurori i SHBA-së për Distriktin Lindor të Nju Jorkut, Joseph Nocellae quajti atë një nga skemat më të turpshme të korrupsionit sportiv që kur bastet sportive online u legalizuan gjerësisht. //a.i/