MOSKË – Medvedev: Aleanca Evropë-NATO pa SHBA-në do të ishte më e keqe për Rusinë

MOSKË, 3 prill /ATSH-DPA/- Një tërheqje e mundshme e SHBA-së nga NATO do të përfaqësonte një përkeqësim të situatës për Rusinë, tha sot ish-presidenti rus Dmitry Medvedev.

“Pjesa evropiane e NATO-s do të mbetej dhe Bashkimi Evropian do të transformohej në një aleancë ushtarake”, shkroi zëvendëskryetari aktual i Këshillit të Sigurisë në Rusi në rrjetin “Max”.

“BE-ja nuk do të ishte më një union ekonomik, por në vend të kësaj mund të zhvillohej me shpejtësi në një aleancë ushtarake të plotë që është jashtëzakonisht armiqësore ndaj Rusisë, e cila në disa aspekte është më e keqe se NATO-ja”, shtoi ai.

“Rusia duhet të braktisë qëndrimin e saj tolerant ndaj pranimit të shteteve fqinje në BE. Kjo vlen edhe për Ukrainën”, tha ai.

Skenarët e diskutuar deri më tani për një fund të luftës në Ukrainë dhe një zgjidhje paqeje në Evropë sugjerojnë se Kievi përfundimisht do t’i bashkohet BE-së.

Udhëheqja ruse nuk ka ngritur asnjë kundërshtim për këtë deri më tani.

Moska ka përjashtuar anëtarësimin e Ukrainës në NATO. Rusia gjithmonë ka pretenduar se pranimi i mundshëm i Ukrainës në aleancën perëndimore të mbrojtjes është arsyeja e pushtimit të plotë të fqinjit të saj.

Aktualisht ka tension të madh brenda NATO-s, pasi presidenti i SHBA-së, Donald Trump ka akuzuar anëtarët se nuk kanë mbështetur SHBA-në në luftën e Uashingtonit kundër Iranit.

Paralajmërimi i Medvedev për një NATO evropiane “të mbetur” shpërfill faktin se armët bërthamore të SHBA-së përbëjnë shtyllën kurrizore të pengesës kundër Rusisë.

Që nga hyrja në fuqi e Traktatit të Lisbonës në vitin 2009, BE-ja ka qenë gjithashtu një aleancë mbrojtëse me një detyrim të ndërsjellë mbrojtjeje midis shteteve anëtare të saj. //a.i/