Macron: Franca siguron dy të tretat e inteligjencës ushtarake që i nevojitet Ukrainës

Presidenti francez Emmanuel Macron ka deklaruar se Franca aktualisht siguron rreth dy të tretat (two-thirds) e inteligjencës ushtarake që i nevojitet Ukrainës në luftën kundër Rusisë.

Këtë deklaratë Macron e bëri gjatë përshëndetjeve me forcat e armatosura franceze në bazën ajrore 125 në Istres (në jug të Francës).

Macron theksoi se shërbimet franceze koordinojnë dhe furnizojnë ushtrinë ukrainase me të dhëna inteligjence thelbësore për planifikimin e operacioneve ofensive dhe mbrojtëse.

 “Ndërsa një vit më parë Ukraina varej kryesisht nga kapacitetet e inteligjencës amerikane, sot dy të tretat e këtyre kapaciteteve sigurohen nga Franca. Dy të tretat!”, u shpreh Macron.

Franca mbetet një nga qendrat kryesore të “koalicionit të vendeve të gatshme” që diskutojnë garanci sigurie dhe mbështetje të mëtejshme për Ukrainën në periudhën pasluftës.

Në samitin në Paris më 6 janar, Macron konfirmoi planet për vendosjen e forcave shumëkombëshe pas përfundimit të luftës, me pjesëmarrjen e Francës, Britanisë së Madhe dhe partnerëve të tjerë.

Ai theksoi se ushtria ukrainase mbetet “linja e parë” e mbrojtjes, dhe mbështetja e jashtme duhet të forcojë kapacitetet e saj, përfshirë inteligjencën dhe logjistikën.

Parisi po konsideron vendosjen e disa mijëra trupave franceze pas luftës për të kontrolluar kufirin dhe stabilizuar situatën – por këto njësi nuk do të marrin pjesë në operacione luftarake dhe do të vendosen larg vijës së frontit.

/rtsh.al/