Makinat e vjetra largohen nga rrugët e Korçës, më pak ndotje dhe më shumë siguri rrugore

Sipas Bankës Botërore, niveli i motorizimit është rritur me 122% gjatë dhjetë viteve të fundit, ndërsa nga automjetet e regjistruara në vend, 91% janë më të vjetra se 10 vjet dhe pjesa tjetër, e kanë kaluar moshën 20-vjeçare.

Mosha e lartë e mjeteve sjell kosto ekonomike, rrit konsumin e karburantit, ndikon në sigurinë rrugore dhe në ndotjen e mjedisit.

Ndërsa në nivel kombëtar nevojiten masa për rinovimin e flotës, nxitjen e automjeteve elektrike, forcimin e transportit publik dhe përmirësimin e sigurisë rrugore, në Korçë procesi i çregjistrimit të mjeteve të amortizuara po sjell ndryshime konkrete.

Dhjetëra automjete të vjetra janë nxjerrë jashtë përdorimit, duke ulur moshën mesatare të flotës dhe duke kontribuar në reduktimin e ndotjes së ajrit dhe rritjen e sigurisë në rrugë.

Sipas të dhënave të fundit, një numër i konsiderueshëm automjetesh të amortizuara dhe me moshë të lartë janë nxjerrë jashtë përdorimit.

Për vitin që lamë pas, çregjistrimi i përhershëm është bërë për rreth 220 mjete me moshë kryesisht mbi 20 vjeçare. Sipas specialistëve, ky proces pritet të ndikojë pozitivisht si në cilësinë e ajrit, ashtu edhe në sigurinë e qarkullimit rrugor.

Çregjistrimi i mjeteve të vjetra dhe zëvendësimi i tyre me automjete më të reja shihet si një hap i rëndësishëm drejt një transporti më të sigurt, më ekonomik dhe më pak ndotës, duke kontribuar në një qytet më të pastër dhe më të jetueshëm.

Gazetare: Geralda Manushi

/rtsh.al/