Manchester United siguron Champions League, Mainoo vendimtar ndaj Liverpool

OLD TRAFFORD, 3 maj /ATSH/ – Manchester United ka siguruar kualifikimin në UEFA Champions League, pas fitores ndaj rivalëve të Liverpool FC. Vendimtar ishte goli i talentit Kobbie Mainoo.

Mesfushori i ri realizoi golin e fitores në një përballje të fortë, duke vulosur një kthesë të rëndësishme për sezonin e “Djajve të Kuq”.

Pas ndeshjes, Mainoo u shpreh se rikthimi i ekipit është meritë e të gjithëve: “Ta kthejmë sezonin në këtë mënyrë është meritë e lojtarëve dhe trajnerit. Duam të vazhdojmë të fitojmë, të fitojmë, të fitojmë”.

Ai theksoi gjithashtu vështirësitë personale gjatë pjesës së parë të sezonit: “Është gjithmonë e vështirë kur nuk luan. U përpoqa të punoja fort dhe të shikoja përpara”.

Mainoo vlerësoi ndikimin e trajnerit Michael Carrick, duke theksuar se ai i ka dhënë besim skuadrës: “Të jep shumë besim. Do ta ndjekësh, do të luftosh për të në fushë. Mendoj se e treguam këtë sot”.

Që prej marrjes së drejtimit në janar, Carrick ka arritur fitore ndaj rivalëve kryesorë si Manchester City, Arsenal FC, Chelsea FC dhe Liverpool, duke treguar një ecuri mbresëlënëse në krye të skuadrës.

Mainoo e përmbylli duke theksuar lidhjen e tij me klubin: “Jam i bekuar që jam në këtë pozicion. Kam ëndërruar për ditë si kjo. E ardhmja ime është këtu”.