Medvedev paralajmëron për pasoja të rënda nëse SHBA furnizon Ukrainën me raketa Tomahawk
Ish-presidenti rus Dmitry Medvedev deklaroi të hënën se furnizimi i Ukrainës me raketa Tomahawk nga Shtetet e Bashkuara mund të ketë pasoja të rënda për të gjithë, veçanërisht për Presidentin amerikan Donald Trump.
Në një reagim të publikuar në Telegram, Medvedev tha se është e pamundur të dallohet nëse raketat Tomahawk mbajnë koka bërthamore apo konvencionale pasi ato të lëshohen – një shqetësim që është ngritur më herët edhe nga zëdhënësi i Kremlinit.
“Si duhet të përgjigjet Rusia? Pikërisht!”, shkroi ai, duke lënë të kuptohet se një përgjigje bërthamore nga Moska nuk përjashtohet.
Komentet e Medvedevit erdhën pas deklaratës së Presidentit Trump të dielën, i cili tha se mund të autorizojë dërgimin e raketave Tomahawk me rreze të gjatë veprimi në Ukrainë nëse Presidenti rus Vladimir Putin nuk i jep fund luftës.
“Po, mund t’i them atij (Putinit), nëse lufta nuk zgjidhet, mund ta bëjmë fare mirë. Mund të mos e bëjmë, por mund ta bëjmë… A duan që raketat Tomahawk të shkojnë në drejtimin e tyre? Nuk mendoj kështu,” deklaroi Trump.
Medvedev reagoi duke shkruar se “Mund të shpresojmë vetëm që ky të jetë një tjetër kërcënim i kotë… Si dërgimi i nëndetëseve bërthamore më afër Rusisë.”
Presidenti rus Vladimir Putin ka paralajmëruar më herët se furnizimi i Ukrainës me raketa Tomahawk – të cilat kanë një rreze veprimi deri në 2,500 kilometra dhe mund të godasin objektiva në të gjithë territorin evropian të Rusisë, përfshirë Moskën – do të shkatërronte marrëdhëniet mes SHBA-së dhe Rusisë.
/rtsh.al/