Ndahet nga jeta ish-kryetari i Kuvendit, Servet Pëllumbi
TIRANË, 5 maj/ATSH/ Ish-kryetari i Kuvendit, Servet Pëllumbi u nda sot nga jeta në moshën 89-vjeçare.
Pëllumbi ishte një prej figurave themeluese të Partisë Socialiste të Shqipërisë dhe ndër personalitetet më të spikatura të politikës shqiptare në periudhën e tranzicionit. Ai vlerësohej gjerësisht për integritetin dhe kontributin e tij në vitet ’90.
I lindur në Korçë, ai ndoqi studimet e larta në Universiteti i Shën Petërsburgut, ku mori titullin Doktor i Shkencave në letërsi. Karrierën e nisi në fushën akademike si pedagog në Institutin Pedagogjik të Korçës gjatë viteve 1960–1963, duke vijuar më pas në mësimdhënie deri në vitin 1977.
Më tej, u përfshi në strukturat drejtuese të Partia e Punës e Shqipërisë, ndërkohë që ushtroi edhe detyrën e pedagogut në Universiteti i Tiranës.
Me fillimin e ndryshimeve demokratike në vitin 1990, Pëllumbi u emërua nënkryetar i Partisë Socialiste, detyrë që e mbajti deri në vitin 1996. Ai luajti një rol të rëndësishëm në organizimin e fushatave politike të socialistëve, përfshirë kundërshtimin e referendumit për Kushtetutën, si dhe angazhimin për lirimin e Fatos Nanos.
Pëllumbi mbahet mend si një ndër deputetët më jetëgjatë të Kuvendit të Shqipërisë, me një kontribut të vazhdueshëm në jetën parlamentare dhe në komisionet kryesore të tij.
Ndarja e tij nga jeta përbën një humbje të rëndësishme për politikën shqiptare dhe për historinë e tranzicionit demokratik në vend.
Në një reagim në rrjetet sociale, kreu i grupit parlamentar të Partisë Socialiste, Taulant Balla, thekson se Pëllumbi i dha vlerë Kuvendit me drejtimin e tij.
“Lamtumirë Profesori ynë i madh Servet Pëllumbi. Sa shumë do donim të të kishim në ditëlindjen e 35-të të Partisë sonë Socialiste, të cilës i dhe shumë nga vlerat e tua në kohë të vështira kur u desh ta drejtoje. Kuvendit të Shqipërisë i dhe gjithashtu vlerë me drejtimin tënd të pazëvendësueshëm”, shkruan Balla.
“U prehsh në paqe Profesor Serveti! Kuvendi i Shqipërisë, Partia Socialiste dhe familja do të njoftojnë në vijim ceremonitë në respekt të këtij njeriu të madh”, përfundon postimi i Ballës.
/k.s/a.f/r.e/