“Në kohë reale”- Avokati i mjekut Hasi: Akuza fillestare për të garantuar arrestimin, ishte qartësisht e provuar se nuk kishte vepër penale

Çështja e dënimit me 15 muaj burg të mjekut Dervish Hasi, ku akuza e prokurorisë u ndryshua nga “Trafik i të miturve dhe pornografi” në “Dhunë në familje” nga gjykata, duket se vazhdon të jetë në qendër të vëmendjes publike.

Në një rrëfim ekskluziv në emisionin “Në kohë reale” në RTSH, moderuar nga Flori Gjini, avokati mbrojtës, Shkëlqim Mustafa, nxori në pah, sipas tij, anët e “deformuara të këtij rasti”, duke argumentuar se vështirësia profesionale ishte minimale, pavarësisht “zhurmës mediatike”.

“Realitet i deformuar” nga mediat

Avokati Mustafa pranoi se fillimisht ishte i prekur nga narrativat negative rreth klientit të tij, por analiza e dosjes zbuloi një realitet tjetër.

“Në Shqipëri është garë mediatike që të mundohesh të marrësh të dhëna nga dosja, dhe ku ndonjë gjë e vogël tentohet të bëhet e madhe,” deklaroi avokati, duke shtuar se në 99% të rasteve publiku merr një “realitet të deformuar të çështjes”.

Mustafa konstatoi se, pasi shqyrtoi materialin, hetimi ishte shterues, por “ishte qartësisht e provuar se nuk kishte vepër penale” sipas akuzave fillestare.

Sipas avokatit, akuza fillestare për “trafik të të miturve dhe pornografi” u ngrit si një mjet për të garantuar arrestimin e menjëhershëm të mjekut.

Në qendër të çështjes qëndronte një kallëzim nga babai i vajzës, i cili nuk pranonte lidhjen dashurore të vajzës së tij me mjekun. Avokati theksoi se:

Vajza ishte më shumë se një vit mbi moshën e parashikuar nga Kodi Penal për lidhje intime (moshë ligjore).

Lidhja ka nisur vetëm pasi vajza kishte arritur moshën e pjekurisë ligjore.

Ndryshimi i akuzës në “dhunë në familje” në gjykatë, pas mbylljes së hetimeve për akuzat e rënda, tregon, sipas mbrojtjes, pasaktësinë e nisjes së hetimit.

Avokati Mustafa u shpreh se do të jetë i rezervuar në detaje të mëtejshme, pasi gjykimi është zhvilluar me dyer të mbyllura.

/rtsh.al/